E Departamento di Enseñansa Hulandes DUO (Dienst Uitvoering Onderwijs) lo ta presente pa fin di 2019 y tambe na final di 2020 pa temporadanan largo pa conseha ex studiantenan Curasoleño con pa paga bek nan debe.

Asina un carta di e Minister Hulandes di Enseñansa Ingrid van Engelshoven (D66) manda pa Minister di Enseñansa di Corsou Marilyn Alcalá-Wallé (PAR) ta bisa. Segun e carta, ex studiantenan cu a caba nan estudio y ta den e di dos ‘aanloopfase’, lo haya invitacion personal pa un sesion di informacion. E meta di e sesionnan aki ta pa e ex studiantenan haya bon informacion tocante e prome fase di paga bek nan debe, y tambe pa nan haya sa ki posibilidadnan social tin pa paga bek. E sesionnan aki ta primordialmente pa personanan cu awo ta bay cuminsa paga bek, pero tambe esunnan cu ta pagando caba por participa, segun van Engelshoven.

Banda di esaki a manda cartanan pa ex studiantenan cu tin problema cu paga bek nan debe, unda ta invita nan pa un combersacion na Stichting Studiefinanciering Curaçao (SSC) pa asina ‘busca un solucion hunto’. Tambe futuro studiantenan lo haya sesionnan di informacion. Riba un keho specifico di e minister di Corsou, Van Engelshoven a bisa cu e problema di DigiD ta resolvi, mirando cu cualkier persona cu a yega di ta inscribi na Hulanda y ainda tin un number di BSN por pidi pa un DigiD nobo of pa reactiva esun cu nan tabatin anteriormente. DUO a crea un email special, antillen@duo.nl, pa contesta preguntanan personal cu studiante of ex studiante lo por tin.

Riba e preocupacion di e minister di Corsou cu no lo tene den consideracion studiante Caribense su habilidad pa paga bek, e minister Hulandes no por a haya su mes den esaki y a bisa cu e lo ta interesa pa haya sa kico specificamente a sosode den e casonan cu el a mira. E ta sigui splica cu pa tur ex studiante ta aplica e mesun maneho: e studiante su propio situacion ta loke ta determina cuanto e por paga bek. Esaki ta depende riba declaracionnan di departamento di impuesto, pero ora DUO no por haya esaki na tempo ex studiantenan por manda e informacion direct na DUO.