Segun un ekipo di periodistanan internacional ainda tin contrabanda di oro tumando luga entre Venezuela y Corsou. Ademas segun e Organisacion pa Cooperacion Economico y Desaroyo (OESO) cada luna tin centenares di kilo di oro sin autorisacion ta pasa via courier y post, entre paisnan Colombia, Aruba y Corsou.
Personanan na Corsou y Aruba ta bende e oro na contactonan na Merca y Europa, segun un rapport di Conseho Socioeconomico (SER). E organo a haci investigacion den cuadro di duna conseho riba e proyecto di ley LB Ham ter vervanging van de tijdelijke regeling In-, uit- en doorvoerverbod Venezolaans goud.
SER: “Hasta oro cu ta bin di Colombia of otro paisnan Latino Americano lo por ta procedente di Venezuela, unda nan ta bende na personanan local cu ta laba e oro, cual despues nan ta manda Colombia. Por medio di transporta e oro entre fronteranan y agrega na e produccion di otro pais, criminalnan por evita sancionnan internacional, mescos ta pasando na Colombia.”
Pa e rason aki SER no ta convenci cu prohibi importacion y exportacion di oro na Venezuela lo stop gruponan pa logra ‘legalisa’ esaki den otro pais, pa asina e por yega na e islanan.
Durante casi un aña un team internacional di periodista a investiga e negoshi di contrabanda di oro di Venezuela, cual a indica cu entre 2014 y 2018 a logra manda 160 mil kilo di oro di Venezuela via Aruba y Corsou na mercadonan internacional. Di e 160 mil kilo, 130 mil kilo a bay via Corsou. En total e ta yega na un baloracion riba mercado di 6.5 miljard Euro.
