E colaboracion entre Cas di Siguridad (Veiligheidshuis) Corsou, cual ta cay bou Stichting Ambulante Justitiële Jeugdzorg Curaçao (AJJC), y Veiligheidshuis Rotterdam Rijmond (ZVHRR) ta estableci oficialmente desde e siman aki por medio di un convenio di colaboracion oficial.
Pa e evento aki e burgermeester di Rotterdam, Ahmed Aboutaleb, Minister di Husticia Quincy Girigorie (PAR) y presidente di AJJC Anthony Richardson tabata presente na Sunscape Resort Corsou. E Cas di Siguridad di Corsou, mescos cu tin na Aruba, ta un concepto di colaboracion entre partnernan den cadena di husticia ta colabora cu instancianan di cuido y enseñansa riba casonan particular di entre problema social bou hoben, asina mirando e problema di un manera multidisciplinario. Cas di Siguridad Corsou ta existi desde 2014, unda ta colabora entre otro Ministerio Publico (OM), e funcionario publico encarga cu Leerplicht, Polis, Voogdijraad y Gezinsvoogdinstelling (GVI).
Otro partnernan cu ta involucra den e concepto multidisciplinario aki ta: Justitiële Jeugdinrichting Curaçao (JJIC, anteriormente GOG), prizon SDKK, instituto di hoben Yave, Bureau Slachtofferhulp, Centrum Familie en Jeugd, Rooms Katholiek Centraal Schoolbestuur (RKCS), Psychiatrisch Maatschap, Skuchami, Brasami, Stichting Acretio. Skuchami ta ofrece ayudo psicologico na personanan ambulante, Brasami ta yuda piki ambulante riba caya, mientras Stichting Acretio ta duna ayudo y guia temporario na studiantenan cu pa via di nan conducta no ta posibel pa controla nan mas riba scol.
Veiligheidshuis Corsou actualmente ta trata tanto hobennan cu ta den riesgo di bay den mal caminda, como tanto hobennan cu ya caba a haya nan mes enfrenta cu husticia. Veiligheidshuis Rotterdam Rijnmond ta traha hunto cu organisacionnan di husticia y cuido den 15 gemeente den region Rotterdam Rijnmond y tin como meta aporta na un sociedad (mas) sigur y bahamento di recidivismo.
