Mirando e denuncia cu Human Rights Defense Curacao a haci na Amnesty International, director di Amnesty International Hulanda a haci un apelacion riba gobiernonan di Hulanda y Corsou pa trece un fin na e ‘situacionnan deplorabel’ di detencion di Venezolanonan pidiendo asilo na Corsou.
E director, Dagmar Oudshoorn, a bisa medio NOS cu “ta tristo mira con leu e situacion mester yega, awo conduciendo nan pa bay den welga di hamber”. Tin peticionario di asilo cu tin mas cu 8 luna cera den situacionnan sumamente deplorable, memey criminalnan cu a haya sentencia contra nan, den Corsou su prizon SDKK.
E situacion den cual e Venezolanonan ta haya nan mes, ta entre otro cu nan ta haya cuminda laat, y den cierto casonan no ta haya cuminda mes, banda di haya poco chens pa mira luz di dia pafo di nan cel. Nan abogadonan, ademas, no ta haya hopi chens pa yuda nan. Oudshoorn kiermen cu e organisacion a perde conteo di cuanto alarma Venezolanonan a bati paden di SDKK. “Hende cu ta pidiendo proteccion, no por ta deteni. Sigur no bou e circunstancianan deplorable aki.”
Amnesty ta haci un yamada na prome minister Eugene Rhuggenaath pa drecha e situacion deplorable di e personanan Venezolano pidiendo asilo inmediatamente, y tambe pa busca un alternativa pa detencion. “Hulanda tambe mester duna su aporte maximo pa percura cu esaki pasa”.
Un caso en particular, di Venezolanonan deteni na SDKK, ta esun di Danilo Diaz Branchi. Segun Minister di Husticia di Corsou, Diaz Branchi ta cera pasobra e ta riba un lista di Interpol. Sinembargo segun Maya Elzinga-Soumah, abogado di Diaz Branchi, e ta e ehempel di un refugiado politico cual ta core peliger na Venezuela. Oswald Rodriguez Leon, kende ta e hefe di e servicio di inteligencia di Venezuela, lo a pone Diaz Branchi riba e lista aki. E abogado a bisa cu “Rodriguez Leon ta conoci pa ehecuta desaparicion di oponentenan politico di Maduro”.
E abogado a bisa cu e echo cu su cliente a aparece riba e lista di Interpol, tabata e rason dicon el a dicidi bay Corsou y pidi asilo.
