Durante e prome 9 lunanan di 2019 e sector turistico a genera mas o menos 1.600 miyon florin pa economia di Corsou. Compara cu e mesun periodo di aña pasa, esaki ta encera un crecemento di mas o menos 7.8 porciento.
Asina Giselle McWilliam, como Minister di Desaroyo Economico, a anuncia antayera durante un conferencia di prensa en conhunto cu partnernan di e industria turistico. A bin dilanti tambe cu den e periodo entre januari y september 11% mas turista a yega Corsou den mesun periodo di 2018. Den prome 9 luna di 2019 a registra 346 mil turista como bishitante na hotel, compara cu 311 mil den 2018.
Mayoria turista cu a bishita Corsou ta bin di Hulanda, Merca, Colombia, Canada, Alemania y Brazil. E mercadonan aki a zorg pa 77% di e cantidad total di turista den e periodo aki, segun un presentacion di Curacao Tourist Board (CTB). E cantidad total di bishitante procedente di Norte America a hisa cu 7%; mientras Sur America a hisa cu 14%, Caribe cu 20% y Europa cu 11%.
Tambe den turista di crucero a mira un desaroyo positivo, maske esaki tabata mas modesto, segun Curacao Ports Authority (CPA), mirando cu e cantidad di crucero cu a drenta a hisa cu 2%. Si mira e cantidad di turista di crucero por mira cu esaki a hisa cu 3.1% compara cu e aña anterior, mirando cu e aña aki a mira 541 mil turista di crucero, segun CPA.
Asociacion hotelero Chata, contrario na e data aki, si a mustra un depresion den e cantidad di ocupacion hotelero. Segun Chata e prome 9 lunanan di e aña mira un baho di e ocupacion cu 2.5%. E ocupacion e aña aki tabata consisti di 67.9% mientras durante e mesun periodo di aña anterior e tabata un 70.4%.
RevPAR (Revenue per Available Room) mientrastanto a baha cu 2.5%, di 101,16 dollar den 2018 pa 98,57 dollar den 2019.
