Willem III Toren ta e monumento cu ta identifica Earth Hour na Aruba

“Pa tin Willem III Toren riba mapa internacional como e monumento reconoci pa Earth Hour International ta un gran honor”, asina e manager di Museo Historico, esta Joase-Ann van der Biest ta entusiasma y contento pa mira e imagennan di Willem III Toren y Fort Zoutman cu pa e prome cinco añanan di e celebracion di Earth Hour na Aruba a circula internacionalmente. Riba diasabra 19 di maart Earth Hour Community Group Aruba ta celebra Earth Hour pa e di seis biaha y for di e prome aña caba, a scoge Willem III Toren como e edificio iconico pa identifica e evento na Aruba.

Rond mundo e diferente “community groups” na diferente pais y den varios ciudad ta haci peticionnan special pa paga e luznan di un edificio iconico pa un ora, entre 8’or y mey y 9’or di anochi. Durante di e ora aki, yama Earth Hour ta tuma un momento pa, entre otro, refleha riba e compromiso cu cada persona tin cu Mama Tera, pa cada persona cera un compromiso nobo pa e aña nan dilanti pa cu un bida mas sostenibel.

Rond Aruba Earth Hour a bira pa algun famia y scolnan un tradicion caba, un momento pa paga tur luz, television y otro aparatonan electrico y electronico no necesario, y disfruta di un ora ameno hunto ta combersa, come y comparti. Actualmente na Aruba ta conta tambe cu participacion di diferente hotel y nan huespednan.

Na 2011 a logra cu excelente cooperacion di parti di Minister Michelle Hooyboer-Winklaar, e tempo ey den e funcion di titular di cultura y e Museo, pa organisa e evento pa e di prome biaha na Fort Zoutman, y for di e prome Earth Hour na Aruba, semper a bolbe na edificio iconico pa e ocasion aki.

Museo Historico ta orguyoso pa un biaha mas habri su portanan pa ricibi e comunidad celebrando Earth Hour. Edward Erasmus y su famia ta entre grupo nucleo cu a inicia cu e celebracion di Earth Hour na Aruba y den nomber di e Community Group di Aruba a gradici Museo Historico pa ta nan cas pa Earth Hour pa e di seis evento anual na Aruba. Ta un placer pa tur esunnan cu ta envolvi cu e museo pa celebra hunto cu tur hende cu ta conmemora Earth Hour hustamente denter di e murayanan di un edificio cu ta existi pa 147 aña caba, prome cu e fanfaria moderno actual y invencion di coriente.

Ta celebra Earth Hour pa e di ocho aña mundialmente y den transcurso di añanan mas y mas pais y ciudad ta uni na e iniciativa y gruponan rond mundo ta comparti e potretnan di nan evento y e detayenan di nan compromiso cu Mama Tera cu hopi entusiasmo. 

E evento pa Earth Hour ta cuminsa cu un “glow in the dark” fun walk di 3 kilometer cu ta cuminsa y caba na Fort Zoutman. Lo tin T-shirt y obhetonan “glow in the dark”, den un cantidad limita, pa e participantenan. Na cabamento di e caminata ta invita tur participante pa presencia e pagamento di luz y uni na e celebracion paden di e forti, cu cendemento di bela y otro actividadnan. Earth Hour na Willem III Toren/Fort Zoutman, incluyendo e caminata, ta un evento gratis.