Actualmente Willem III Toren mester di un renobacion y pa realisa e trabou aki lo cuminsa cu diferente actividad pa recauda fondo. E prome di nan lo tuma luga dia 17 y 18 di maart den cuadro di nos Dia Nacional di Himno y Bandera.
Segun manager di Museo Historico Arubano, Joasy van der Biest e trabou aki lo ta den carera di 1 miyon florin. Actualmente nan ta den combersacion cu Monumenten Bureau Aruba pa asina haci e plan y evaluacion di tur e proyecto aki. Ya cu e toren mester keda den su structura y color autentico manera e ta. Considerando cu e toren aki tin casi 150 aña, toch e ta den bon estado pero mester di trabou di renobacion. E ta un di e monumentonan mas bieu na Aruba, y no mester lubida cu Fort Zoutman tin 219 aña.
Historia
Pero mirando e plan grandi cu Meseo Historico Arubano tin conhuntamente cu su organisacion mama cu ta Fundacion Museo Arubano (FMA), e ta haya cu e toren aki mester conta su historia. Actualmente Museo Historico Arubano ta situa den e icono monumental aki di Fort Zoutman, y pa nan haci un exposicion ariba nan mes, e monumento aki mester keda restaura di un forma apropia. Museo Historico ta un di e cinco museonan cu ta cay bou FMA hunto entre otro cu Museo di Industria y Museo di Comunidad; ainda Museo Arkeologico su status no a wordo defini.
Sra. Van der Biest ta bisa na Bon Dia Aruba cu e idea primordial di e actividad di 18 di Maart no ta solamente pa recauda fondo pero pa consciente nos comunidad riba importancia di cada monumento. Den investigacion historico haci, nan a yega na puntonan hopi importante, entre otro cu e forti aki a wordo construi inicialmente pa defende nos isla contra pirateria. Te hasta incluso el a bira un proteccion of defensa di e autoridadnan di e tempo aya contra pueblo tambe.
Simbolo di libertad
Actualmente e forti aki cu ta cay bou Museo Historico Aruba e ta haya cu e “tin e tarea mas grandi. E tarea di herencia cultural”. P’esey e ta considera importante di por educa nos hendenan cu e toren cu a wordo construi den e mesun temporada cu Koning Willem III di Hulanda a firma abolicion di sclavitud. “E ora ey nos ta bisa cu e toren aki ta un simbolo di libertad.” Ora cu nan ta yega na e punto di e contenido di e toren, sra. Van der Biest ta haya cu e tin un balor historico hopi rico ya cu tin hopi di conta di dje. “Mas motivacion ainda pa nos traha mas duro pa educa y reeduca nos pueblo cu ta hopi importante y traspasa pa e generacion nobo.”
Buraco den herencia cultural
E ta haya si cu ta existi un buracio di dos generacion cu no a haci e traspaso di e herencia cultural aki; y e generacion actual tin “hamber” pa sa mas di nos historia y for di unda nos ta bini. Nan ta realisando actividad cu e muchanan den cuadro di nan celebracion di luna di maart cu ta luna di cultura pa honra e ofishi bieu di vlechtdo.
Competencia di poesia
Nan di Museo Historico Arubano ta considerando nan mes como e fundeshi di e cultural di Aruba. Nan kier carga e cultura mas na pecho ya cu pa nan ta un honor cu e aña aki un biaha mas riba dia 15 di maart nan ta bay tin e competencia di poeta di patria den nos lenga Papiamento bou e tema: “Grandesa di Bo Pueblo ta su Gran Cordialidad” cu lo tuma luga riba stage di e Fort Zoutman den cuadro di apertura di e plasa nobo Padu Lampe riba dia 17 di maart di 6or atardi pa 10or anochi.
Replica di Fort
Gabrielle Ras kende ta stagiaire na Museo Historico Arubano a bisa cu un actividad cu nan ta organisando tin di haber cu un competencia di replica di e Fort Zoutman y Willem III Toren den su forma original cu nan a wordo construi.
E ta declara na e matutino aki cu e regla basico di e competencia di replica ta cu nan mester wordo traha cu material recicla solamente; y e mester ta un obra original. Te dia 16 di maart e hendenan interesa lo por participa libremente entregando nan replica di e monumento aki.
E acogida di e competencia aki ta bayendo bon y lo tin premionan pa e tres ganadonan. Durante e festival organisa pa dia 17 y 18 di maart, e huradonan lo eligi e ganadonan y nan lo wordo anuncia riba dia 18 di maart mes.
