(AP) – Will Smith a subi escenario cu Jada mientras e tabata promove su memoir nobo na Baltimore riba diaranson, declarando sosten pa resto di su bida na su persona un siman despues cu Jada a revela cu e pareha tin desde aña 2016 separa.
“Jada ta e miho amiga cu mi a yega tin riba e planeta aki y mi lo sigui sostene pa resto di mi bida,” el a conta e audiencia na Enoch Pratt Free Library, creditando Pinkett Smith su sacrificionan pa su exitonan, segun noticieronan a reporta.
Smith su presencia cu nan dos yiunan Jaden y Willow ademas di Will su yiu homber Trey smith aparentemente tabata un sorpresa pa Pinkett Smith. El a bini na fin di e dialogo tocante su buki “Worthy.” Pinkett Smith a bisa cu e famia, incluyendo su tio y tanta ademas di Will su mama y ruman muhe tabata presente pa celebra cumpleaños di Jada su mama, Adrienne Banfield-Norris.
Smith a yama nan relacion ‘brutiful’ (brutal/beautiful) splicando cu e relacion ta ambos brutal y bunita. “E ta un experimento publico slordig di amor incondicional,” el a expresa, un descripcion cu a causa cu tanto Pinkett Smith y resto di audiencia a cuminsa hari. Pinkett Smith a conta Baltimore Sun cu nan separacion ta den pasado y cu su persona cu Smith tin e ultimo 18 luna trahando pa repara nan relacion. “Ami cu Will ta bon,” Pinkett Smith a conta Laura Coates di CNN. “Tur hende cu no ta compronde y kier bisa algo lo mester warda den rij. E hecho ta cu mi no ta bay separa di Will ni e lo laga ami tampoco. Nos a cuminsa un aventura poderoso y mi ta mas feliz di loke mi a yega di ta,” el a agrega.
