Un proyecto cu e fundacion Koningin Wilhelmina Kanker Fonds Aruba (KWF) lo kier concretisa e aña aki mes, tin di haber cu nan sede nobo na San Nicolas.
Presidente di KWF, Lily Prince, a laga sa cu e proyecto aki ta uno prometedor, ya cu Crossing For Hope a bisa cu lo yuda KWF pa logra e realisacion di esaki. Aña pasa, e evento aki organisa pa Crossing For Hope, caminda 5 landado a landa for di Venezuela pa Aruba, a produci e bunita suma di 130.626, 67 florin den caha di KWF.
Segun Sra. Prince, Crossing For Hope a bisa cu e fondo cu nan ta colecta ta bay den un proyecto. E proyecto principal cu KWF tin di haber cu e apertura di un oficina of sede na San Nicolas.
Actualmente, KWF tin hopi pashentnan cu ta di pariba di brug, y nan kier duna e servicio mas cerca nan. Actualmente, ora e pashentnan aki tin cu bin Playa, nan tin cu sali prome cu 8or di mainta pa yega Playa. Nan ta haci nan diligencia cerca KWF, pero ora cu nan ta yega San Nicolas bek, ta despues di merdia.
Tin algun di nan cu ta bin cu bus cu ta laga nan na Wilhelminastraat. E clientenan aki, pashent di cancer, tin cu bin cana te oficina di KWF y bay bek meymey di e solo pisa pa bay San Nicolas. “Un persona cu ta un pashent bo tin cu dun’e e amor, cariño y calidad di bida cu e merece,” Prince a declara na Bon Dia Aruba.
KWF ta buscando un edificio central cu por ta accesibel pa nan clientenan di pariba di brug. Nan tin un na bista caba, y e ta spera cu pronto lo por concretisa e proyecto aki. Sra. Prince a laga sa cu e problematica di cancer ta sigui aumenta. Pero e dolor ta cu edad di e pashentnan ta birando mas jong.
E ta un situacion cu ta afecta su persona hopi, pasobra e ultimo añanan cu Sra. Prince ta dunando les na scol, tin biaha e tin cu hay’e den e situacion doloroso cu un alumno di dje ta pasando den e situacion dificil aki. “Esaki ta haci bo dolor,” el a declara na Bon Dia Aruba.
