(AP) —E Organisacion di Salud Global (WHO) a bisa cu el a haci peticion oficial na China pa informacion tocante e aumento den malesanan respiratorio y casonan di pneumonia den mucha.
E agencia di salud pa Nacionnan Uni a cita reportahenan den media no specifica y servicio monitoreo pa malesanan contagioso global como reportando casonan di pneumonia no diagnostica den muchanan den parti nort di China. Den un declaracion diaranson. WHO a bisa cu no ta claro si esey tabata conecta cu un aumento den infeccionnan respiratorio reporta pa autoridadnan Chines.
Cientificonan a bisa cu e situacion tin necesidad di monitoreo cercano, pero no tabata convenci cu e aumento recien den malesanan respiratorio na China a seña e comienso di un plamamento global. E aparicion di un cadena nobo di keintura of otro virus capabel di causa pandemianan tipicamente ta cuminsa cu casonan no diagnostica di malesa respiratorio. Ambos SARS y COVID-19 a ser reporta como tiponan inusual di pneumonia.
WHO a nota cu e autoridadnan na e Comision di Salud Nacional na China a reporta dia 13 di november cu tabatin un aumento den malesanan respiratorio, cual nan a bisa tabata debi na e restriccionnan di COVID-19. Otro paisnan tambe a mira un aumento den malesanan respiratorio manera e virus sincitial respiratorio, of RSV, ora restriccion di pandemia lanta.
WHO a bisa cu e media a reporta casonan di pneumonia no diagnostica den muchanan un siman despues. “No ta claro di esnan ta asocia cu e aumento general den infeccion respiratorio cu anteriormente a ser reporta pa autoridadnan Chines, of eventonan separa,” WHO a bisa, agregando cu e a pidi pa mas detaye for di China tocante virusnan cu ta circulando actualmente y cual presion riba hospitalnan, via un mecanismo legal internacional.
Dr. David Heymann di The London School of Hygiene and Tropical Medicine a bisa cu probablemente e causa por ta infeccionnan respiratorio periodico. “E reto ta pa diferencia e plamamentonan y determina e causa,” manera Heyman a bisa den un declaracion, agregando cu casonan isola por ta critico. El a lider e respuesta di WHO pa e plamamento di SARS na 2002-2003.
Francois Balloux di University College London a bisa cu e ola actual di malesa na China tabata probablemente debi na malesanan respiratorio manera keintura, RSV of un infeccion bacterial. El a bisa cu China probablemente ta experenciando un ola grandi di infeccionnan infantil desde cu esaki ta e prome winter desde cu e restriccionnan di lockdown a ser lanta den e pais, cual probablemente a reduci e inmunidad di muchanan pa malesanan comun.
WHO a bisa cu e parti nort di China a reporta un aumento den malesa parecido na influenza desde mey october compara cu e ultimo tres añanan. No ta comun pa e agencia di salud pa NU puntra publicamente pa mas informacion detaya for di otro paisnan, como cu e peticionnan aki ta ser haci internamente.
E plamamentonan a yena algun hospital den e region, incluyendo na Beijing, y autoridadnan di salud a puntra publico pa tuma hiba muchanan cu sintomanan menos severo pa clinica y otro facilidadnan. E cantidad en averahe di pashentnan den e departamento interno di medicina na e hospital di mucha na Beijing a yega te 7,000 pa dia, surpasando e capacidad di e hospital, segun un articulo publica online na comienso di siman.
E Comision di Salud, den un encuesta publica pa e agencia noticiero Xinhua, a sugeri diahuebs cu muchanan cu sintomanan modera “primeramente ta bishita institucionnan di cuido medico of departamentonan pediatrico di hospitalnan” pasobra hospitalnan grandi ta yena cu hende y tin un tempo di espera hopi largo.
E comision a bisa cu e ta tumando atencion na e incidencia halto di malesanan contagioso entre muchanan y ta “guiando autoridadnan local pa expande planificacion coordina y implementa un sistema di diagnosis y tratamento.”
Despues cu SARS a plama na China na 2002, oficialnan na Beijing a bisa dokternan pa sconde pashent, cu algun pashent pone den ambulance mientras cu cientificonan di WHO tabata bishitando e pais. Esey a causa cu WHO a menasa di cera su oficina na China. Casi dos decada despues, China a tarda di duna detayenan importante tocante e coronavirus cu e agencia despues cu e virus e surgi na 2019. WHO a aplaudi e compromiso di China pa stop e virus—algun siman prome cu esaki a causa un pandemia globalmente.
