(AP) – The World Health Organization a duna aprobacion di emergencia na uso di e vacuna contra COVID-19 traha pa Sinovac pa adultonan di 18 aña bay ariba, marcando e di dos vacuna di un compania di China cu ta ricibi un autorisacion di e manera aki.

Den un publicacion, The U.N Health Agency a bisa cu e datos nan cu e expertonan a entrega ta bisa cu dos dosis di e vacuna aki a preveni hende di haya e simptomanan di COVID-19 den mas o menos mita di e hendenan cu a ricibi e vacuna aki. WHO a bisa cu tabatin mas persona adulto cu a participa den e experimento aki haciendo cu nan no por duna un contesta tocante con efectivo e vacuna aki ta den hendenan di 60 aña di edad bay ariba.

“Sinembargo, WHO no ta recomendando un limite di edad pa tuma e vacuna aki” e agencia a bisa, agregando cu e dato nan colecta tocante e uso di Sinovac den otro paisnan ta mustra cu e lo brinda un proteccion suficientemente bon na hendenan di edad mas grandi.

Den april, un estudio publica pa un ekipo di cientifico den Brazil a confirma cu un Sinovac tin un porcentahe di eficacia riba 50% mientras cu un estudio similar den Chile a haya un porcentahe di eficacia di 67%.

Luna pasa, WHO a duna luz berde na e vacuna contra COVID-19 na Sinopharm. Tambe el a autorisa vacunanan traha pa Pfizer-BioNTech, AstraZeneca, Moderna y Jhonson & Jhonson.

WHO’s su autorisacion ta nifica cu e vacuna por ser cumpra pa donacion y otro U.N Agency cu lo uza e vacunanan aki den paisnan cu menos recurso manera e iniciativa di U.N pa distribui vacuna di COVID-19 globalmente, miho conoci como COVAX. E iniciativa aki a perde hopi forsa despues di cu e suplidor mas grandi na India a bisa cu nan no lo por supli mas vacuna te fin di aña pa motibo cu india ta pasando den un ola sumamente grandi cu infeccion nan aumentando cada dia mas.

Aunke WHO a duna e autorisacion aki, te ainda no tin trato confirma entre COVAX y Sinovac.

Den mei, Europa su regulador di droga a cuminsa revisa e vacuna Sinovac, pero e no ta claro pa ki tempo e proceso lo keda cla y lo tuma un decision tocante e autorisacion pa cu e vacuna aki.

Miles di vacunanan Chines a ser otorga na diferente paisnan rond di mundo como parti di tratonan entre paisnan buscando cantidadnan di vacuna desesperadamente despues cu paisnan cu mas recurso a reserva caba cantidadnan grandi di e vacunanan mas conoci caba.

Mientras cu China tin 5 vacuna den uso, e mayoria di nan exportacion ta bin di dos diferente compania; Sinopharm y Sinovac. E vacunanan Chines ta vacunanan “desactiva” traha cu coronavirus morto, compara cu otro vacunanan cual mayoria ta traha cu tecnologia nobo cu ta uza e proteina cu ta rondona e superficie di e coronavirus viviente.