(AFP)—E Organisacion Mundial di Salud (WHO) a bisa ayera cu e teremoto na Myanmar tabata un emergencia di nivel halto mientras e ta busca urgentemente pa 8 miyon dollar pa salba bidanan y preveni brotenan di enfermedad durante e proximo 30 dia.
WHO a bisa cu e cantidad di victima y heridanan di trauma tabata den riesgo di infeccion debi na un capacidad limita di cirugia den e pais, mientras e condicion den Myanmar a nifica cu e teremoto tabatin chance pa intensifica e riesgo di malesa.
“WHO a clasifica e crisis aki como un emergencia di Grado 3—e nivel mas halto di activacion bao e Emergency Response Framework,” segun e agencia a bisa den su apelacion pa financiamento.
E teremoto cu magnitud di 7.7 a dal cerca di e ciudad central di Mandalay diabierna, pa despues sigui un aftershock di magnitud 6.7. E teremoto a causa mas di 1,700 hende morto den Myanmar y al menos 18 den Tailandia.
Den Myanmar, “evaluacion preliminar ta indica un cantidad halto di victima y heridanan relaciona cu trauma, cu necesidad urgente pa cuido di emergencia. Suministro di electricidad y awa ta keda stroba, empeorando acceso di servicionan di salud y aumentando riesgonan di malesanan,” WHO a bisa.
“Heridanan relacion cu trauma—incluyendo fracturanan, heridanan habri y sindroma di ‘crush’—ta den riesgo halto di infeccion y complicacion debi na e capacidad limita di cirugia y un control y prevencion inadecua di infeccion.”
WHO a bisa cu e mester 8 miyon dollar pa responde na e necesidadnan di cuido durante e proximo 30 dia, “pa salba bida, preveni malesa, y stabilisa y restaura servicionan esencial di salud.”
WHO a bisa cu hospitalnan ta sobrepobla, mientras cu e scala di morto, heridanan y daño na facilidadnan di salud “no ta completamente conoci.” E agencia a bisa cu desplasamento den shelternan sobrepobla, combina cu e destruccion di sistemanan di awa y infrastructura di sanitacion, a aumenta e riesgo di brotenan di malesa.
E agencia a bisa cu e prome suministronan di kitnan di trauma pa trata heridanan severo y fractura, y tentnan multifuncional, tambe ta crea espacio pa e cantidad creciente di heridonan, a yega un hospital di 1,000 cama den e capital di Naypidaw.
Materialnan similar ta na caminda pa Mandalay General Hospital. Banda di e intervencionnan di emergencia, WHO a bisa cu e continuidad di servicionan esencial manera inmunisacion tambe ta critico durante e proximo 30 dia.
