(AP) – E cabes di World Health Organization (WHO) a bisa cu e variante di COVID-19 yama delta, cual a surgi prome na India, ta e variante “mas contagioso cu identifica te cu awor”, y a adverti cu e ta plamando den por lo menos 85 pais.

Durante un conferencia di prensa riba diabierna, director general di WHO Tedros Adhanom Ghebreyesus a bisa cu e falta di vacuna den paisnan di menos recurso ta acelerando e transmision di e variante. El a describi un reunion recien cu su persona a atende cu un grupo consehero estableci pa aloca vacunanan.

“Nan tabata desapunta pa motibo cu no tabatin vacuna pa aloca” Ghebreyesus a bisa, criticando paisnan di mas recurso den bista cu nan a nenga inmediatamente di comparti e vacunanan cu paisnan di menos recurso. “Si no tabatin vacuna, kico bo ta comparti?”

Tedros a bisa cu e comunidad global ta fracasando y ta core riesgo di ripiti e mesun erornan haci durante e crisis di AIDS decadanan atras y tambe cometi durante e pandemia di Swine Flu den aña 2009, cual ta vacunanan yegando den paisnan di menos recurso ya despues cu e pandemia a caba.

“El a tuma 10 aña pa por yega na e paisnan di menos recurso ora cu HIV ya caba tabata completamente plama den paisnan di hopi recurso” Tedros a comenta. “Nos kier ripiti e mesun eror?.”

COVAX, un programa inicia pa United Nations (U.N) tin como meta e distribucion di vacuna na paisnan cu no tin hopi recurso, sinembargo, te ainda a fracasa di haci e vacunanan contra COVID-19 accesibel den hopi diferente paisnan, y e proveedor mas grandi di e programa aki no ta premira di cuminsa exporta e vacunanan te fin di aña. E miyones y miyones di dosis nan priminti pa paisnan incluyendo Britain y Merca, no ta planea di yega pronto.

“Pa cu COVAX, e luna aki nos no tin ningun dosis di AstraZeneca su vacuna, ningun dosis di Pfizer su vacuna, ningun dosis e Johnson&Johnson su vacuna” Dr. Bruce Alyward, un consehero di e cabesante di WHO a reconoce. “Cada un di nos proveedornan no tin e capacidad di por provee durante e periodo aki, pa motibo cu otronan ta haciendo demandanan riba e productonan aki, pa vacuna populacionnan hopi hoben cu no ta ni den grupo di riesgo.”

Den bista cu restriccionnan na e fronteranan, y otro medidanan di salud publico ta birando menos fuerte den Europa, Merca y otro paisnan cu porcentahenan di vacunacion halto, oficialnan di WHO ta adverti cu esaki por trece un brote nobo di e virus.

“E situacion Global ta uno increiblemente fragil” segun Maria Van Kerkhove, e cabesante technico di WHO pa cu COVID-19. Van Kerkhove a bisa cu mientras transmision di e virus ta bahando den Europa, tin un cantidad grandi di eventonan cu tur tin como consecuencia, e plamamento di e virus aki.

“E variante Delta di e virus aki lo continua su desaroyo” Van Kerkhove ta agrega. “Aworaki nos salud publico y medianan social ta funcionando, nos vacunanan ta funcionando, nos diagnosticonan ta trahando, nos terapueticonan tambe ta trahando. Pero lo yega un tempo unda cu e virus aki lo sigi desaroya, y e medidanan aki no lo funciona mas.”