WhatsApp ta limitando ‘forward’ mensahe, den un esfuerso pa controla e transmision di desinformacion vincula na brote di coronavirus. Si bo haya un mensahe cu ya a forward mas di cinco biaha, bo por forward esaki solamente na un chat cada bes.
“Nos sa cu hopi usuario ta comparti informacion util, como tambe video dibertido, meme y reflexion of oracion cu nan ta haya importante”, WhatsApp a bisa den un post riba blog ayera. “Sinembargo, nos a mira un aumento significativo den e cantidad di forward, cual usuarionan a bisa nos por sinti abrumador y por contribui na transmision di desinformacion.”
Anteriormente, por a manda mensahenan asina na cinco chat cada bes – un limite cu e servicio di mensahe propiedad di Facebook a impone aña pasa, despues di e violencia y linchamento na 2018 na India, cu tabata vincula na informacion falso cu a plama riba e app.
Por comparti mensahenan un pa un, pero WhatsApp tin speransa cu e friccion agrega lo descurasha hende di casualmente plama rumor. E compania tambe ta prohibi alrededor di 2 miyon cuenta pa luna pa intento di manda mensahenan den gran cantidad of automatisa.
WhatsApp a forma un team cu oficialnan di salud pa crea un hub di informacion di coronavirus, y a provee un donacion di $1 miyon pa combati desinformacion conecta na e malesa. Tambe segun reportenan ta test un caracteristica di fact-checking pa mensahe.
