No por bisa awor con e ayudo pa Aruba lo mester sigui, pero tanto Prome Minister Evelyn Wever Croes y Secretario di Estado di Hulanda pa Asuntonan di Reino Raymond Knops ta consciente cu tin hopi insiguridad nos dilanti. Turismo di Aruba lo por yega na 60 porciento di turismo di 2019 pa fin di 2021.

Esaki ta un proyeccion optimista di Banco Central di Aruba y e sosten di likides di Hulanda, cu ta prestamonan na cero porciento, ta pa dos aña. Esaki ta nifica cu pa comienso di 2022, lo por tin mas presion financiero/economico pa Aruba.

E pregunta ta si Hulanda lo ta dispuesto pa extende e sosten aki. Raymond Knops a bisa durante su estadia na Aruba cu dificilmente por anticipa kico lo pasa, pero cu e ta conoci cu e proyeccionnan di Banco Central. E Secretario di Estado a corda Aruba si cu na Maart lo tin eleccion na Hulanda y no por papia na nomber di e siguiente Gobierno Hulandes. Hecho ta si cu tanto Secretario di Estado Knops y Prome Minister Evelyn Wever Croes ta consciente cu e recuperacion economico lo tuma su tempo.

Locual ta sigur ta insiguridad pa futuro

“Nos ta traha cu proyeccion. Ningun hende lo por bisa ki dia e crisis lo ta tras di lomba, ningun hende por bisa cu siguridad si nos lo sali di e problema. E cifranan (di COVID-19) ta aumentando atrobe,” Prome Minister Evelyn Wever a bisa. “Locual si nos ta haci ta proyeccionnan y a palabra riba e sosten di likides pa e periodo nos dilanti. Pero locual ma bisa hopi biaha ta cu e obhetivo ta pa nos por para riba nos mes mas lihe posibel. Y pa no ta depende di sosten di likides di Hulanda. Ki dia esey lo ta, nos no por bisa.”

A haci palabracionnan cu Gobierno Hulandes unda no a menciona un fecha unda ta termina e sosten. Si no mester, Aruba lo no haci demasiado uso di e sosten. “Pero pa esey tin e CAft tambe. Pero den e caso mas extremo, cu Aruba no ta logra, ta prestamonan cu nos lo bay paga despues, ta keda un momento cu nos por para riba nos mesun pia y bolbe riba mercado internacional. E prestamonan di Hulanda ta na cero porciento y no ta kita di nan pa busca otro mas caro.”

Di su banda Secretario di Estado Raymond Knops a enfatisa e aspecto di insiguridad.

“Mi a lesa e proyeccion di Banco Central y si tin algo cu ta sigur, ta cu tin hopi insiguridad. Locual nos ta haci ta sigui e desaroyo di cerca y purba crea un clima na Aruba, unda e economia por crece. E ta cuminza cu e vacuna. Pero e ta depende tambe di e situacion na Merca, si por tin e siguridad di turistanan cu ta sali di e pais ey pa Aruba. Asina tin otro factor. Locual ta purba ta crea suficiente condicion cu ta permiti cu economia por crece. E ta e unico caminda cu por cana. E ta nifica e ora, mas trabou, mas hende cu tin un bon existencia. Pero ki tempo esaki lo ta e caso, ta dificil pa bisa. Ta dificil pa bisa kico ta bay pasa aki dos aña. E Gabinete Hulandes t’ey te na Maart. Lo bin un gabinete nobo y aunke cu lo mi kier duna un contesta riba un eventual continuacion di e sosten di likides, mi no por haci esey,” Knops a bisa.

Wever Croes Norm

Bon Dia Aruba a puntra Prome Minister Wever Croes y tambe Secretario di Estado cua ta e Wever Croes norm. Manera ta conoci, un di e condicionnan cu Hulanda a impone ta cu esnan den funcion publico/semi publico no por gana mas cu 130 porciento di e entrada di Prome Minister. E pregunta sinembargo ta, cua ta e base pa e 130 porciento. Ambos mandatario a admiti cu e Wever Croes norm ta basa riba salario, mas e asina yama pensioen opbouw mas e toelagenan cu Prome Minister ta ricibi. Den un editorial, Bon Dia Aruba a calcula cu e costo di pensioen pa Prome Minister ta yega na 200 mil florin pa aña. Esaki ta nifica cu un Director di Setar, Elmar, WEB of hasta di otro instancia semi publico lo por gana 130 porciento di e totalidad. Prome Minister Wever Croes a bisa cu e no por bisa cuanto su pensioen ta costa pa aña. Pero na e momentonan aki tin un concepto di ley cu ta inclui tur e cifranan cu awor aki ta na Raad van Advies. Asina cu e concepto di ley ta cla, y ta bay Parlamento, e cifranan aki lo bira conoci.