Wever-Croes a elabora ariba tres nivel pa e proceso di restauracion, recuperacion y reconciliacion

Dialuna 19 di december Gobierno di Hulanda a ofrece su disculpa na Aruba y Caribe Hulandes pa e envolvimento di Hulanda den e pasado di sclavitud. Dialuna atardi, Prome Minister di Aruba, Evelyn Wever-Croes, hunto cu Secretario di Estado pa Husticia y Seguridad, Eric van der Burg, a tene un conferencia di prensa pa elabora un poco mas y contesta preguntanan tocante e tema aki.

Prome Minister Wever-Croes a splica den su contesta na pregunta di un miembro di prensa tocante e daño cu a wordo haci pa motibo di e pasado di sclavitud y kico esaki ta nifica den e contexto di restauracion y recuperacion monetario pa Aruba.

Prome Minister a indica cu nan no a yega eynan ainda na Aruba. El a remarca cu na Aruba nan kier tin specialmente e direccion, e co-dirección, cu nan lo sigui pa locual lo bay pasa y pa aworaki nan ta pensando ariba tres nivel.

E prome nivel, el a menciona, ta simbolico. Nan mester dicidi ki simbolismo nan ta haya na Aruba lo pas na un disculpa asina. Esaki ta un pregunta cu el a enfatisa e no ta contesta riba su mes , pero e comision hunto cu tur hende lo contesta esaki.

El a agrega cu nan a ricibi caba e bon noticia for di e gobierno Hulandes, a traves di e Secretario di Estado, cu nan ta cla pa participa den un memorial pa Virgina Dementricia, ken ta conoci na Aruba como esclavo y ta wordo considera hasta casi un heroe. “Esey bo por bisa lo ta por ta un respuesta ariba e pregunta, pero ami no sa”, el a bisa.

E segundo nivel cu Wever-Croes a menciona ta cu nan kier wak mehoracion den educacion y conscientisacion ariba e tema di pasado di sclavitud. El a splica cu prome lo mester siña tur hende den comunidad kico Aruba su pasado di sclavitud ta precisamente pa por compronde e disculpanan cu Hulanda a ofrece miho.

Den e contexto ey, e digitalisacion di e Archivo Nacional ta hunga un rol hopi importante. Pa esey, Prome Minister a señala, nan a ricibi e bon noticia cu Hulanda ta prepara pa traha hunto y brinda un mayor financiamento pa sigui cu e digitalisaicon di e archivo. Hulanda a indica tambe cu e kier re-print e buki di Luc Alofs pa asina e wordo reparti dentro di e hubentud.

“Esey ta tur loke nos kier logra bao di e nivel dos pa loke ta trata educacion y conscientisacion? Mi no sa, pero nan ta gestonan hopi importante y positivo”, el a remarca.

Como tercer nivel, el a sigui splica, nan kier para keto ariba e daño cu por a wordo ocasiona pa motibo di e pasado di sclavitud.

El a conta cu siman pasa un periodista a puntr’e con grandi e daño ey ta, pero e no tin respuesta ariba e pregunta pasobra aworaki nan ta bay haci e investigacion y te na cual punto e por bisa cu cierto personanan of gruponan di personanan, bario, procesonan, ta den desbentaha pa motibo di e pasado di sclavitud.

“Riba esey nos mester haci bon investigacion y e pregunta ta unabes bo establece esey, con bo lo por actualisa y con bo lo kier actualisa e situacion. Dus pa Aruba ainda nos ta canando nos caminda cu e Minister di Cultura a desplega 1 di juli di e aña aki te 1 di juli 2023. Pero prome cu 1 di juli mester tin un plan concreto y despues mi lo bisa algo mas concreto”, Prome Minister a comenta.

El a enfatisa tambe cu el a menciona durante su discurso dialuna mainta cu no tin necesidad di busca tanto recomendacionnan, tin hopi recomendacion caba y e recomendacionnan ey no ta aplicabel un pa un na Aruba.

E cuestion ta cu nan mester djis reuni, segun el a sigui splica, y dialoga cu mas parti den sociedad pa determina den ki direccion Aruba mester bay. Pa loke ta e actualisacion di e retrasonan, por ta parti tambe di esey ta inclui e lucha contra pobresa. Na mesun momento el a remarca cu na e momentonan aki e no por bisa esey cu seguridad y sigur e no por pone un prijs ariba e dañonan.

“Pa nos, sigur awe ta djis hopi significativo cu e paso aki a wordo tuma pa e gobierno di Hulanda y di aworaki caba nos ta bay traha ariba recuperacion, restauracion y reconciliacion”, el a enfatisa.

Secretario di Estado pa Husticia y Seguridad, Eric van der Burg, a splica tambe cu si mira e pasado di sclavitud di Caribe Hulandes, e paisnan cu e tempo ey ainda no tabata pais y Surinam, por mira diferencianan grandi entre e seis islanan y Surinam. Y pa keda cerca di cas, pa loke ta trata sclavitud, por wak un diferencia grandi entre Corsou y Aruba.

El a menciona tambe cu den su discurso Minister Presidente Rutte a papia hopi di Surinam. El a splica cu di un banda esey tin di haber cu conscientisacion cu na Hulanda pa un parti ainda mester tuma luga pasobra pa loke ta trata conscientisacion e diferencianan, entre por ehempel Corsou y Surinam ta na un banda y Aruba y Boneiro ta otro banda, y esey mester bin hopi mas pa dilanti.

“Si nos wak e situacion na Aruba esaki no tabata comparabel den ricibimento cu locual cu a pasa na Corsou y Surinam. Manera mi a comenta durante e reunion di awe tardi, si abo ta un esclavo, e ora pa bo e no ta haci diferencia si bo ta un di e 500 of un di e 50 mil personanan, abo ta esun cu a wordo sclavisa”, Van der Burg a indica.

El a remarca cu pa Hulanda tabata hopi importante tambe pa adresa tur shete pais na mesun momento pa asina haci duidelijk cu aunke tin diferencianan historico, no lo tin diferencianan den futuro y cu pa individuonan e no lo haci diferencia.

“Manera boso Prome Minister a bisa aworey, awe mainta (dialuna mainta) nos a menciona tres caso cu nos lo tene na cuenta, pero mi a menciona tambe cu banda di esey nos lo pone fondonan cu no lo ta solamente disponibel na Hulanda Europeo. E placa ey ta dirigi tambe hustamente pa Surinam y e paisnan den reino y e congregacion special den reino”, el a señala.