E punto tras di bin cu licencianan (permisonan) pa cultivo di cannabis medicinal cu fin di exportacion, cual prome minister a indica lo ta ‘hopi caro’, y ‘dificil pa haya’, ta pa diversifica entrada di gobierno pa cera buraconan den finanzas publico. E mandatario ta duna detaye riba con ta bay logra haya 15 miyon den caha di gobierno presupuesta pa fin di aña via e permisonan aki y tambe ki vision gobierno tin pa e cultivo.

Prome minister Evelyn Wever-Croes (MEP) durante un conferencia di prensa ayera mainta a bay riba e topico di cannabis medicinal, cual conoce dos fase. E prome, cual ta encera importacion di producto di cannabis cu ya caba ta aproba pa paisnan unda esaki ta legal, ya caba ta legal. Loke ainda lo mester implementa ta haci legal e cultivo di cannabis cu fin di bira producto medicinal pa exportacion.

Anteriormente CAft a cuestiona con esaki lo por ta realistico si no tin e base legal pa introduci esaki den termino rasonabel pa asina haya e entrada. Banda di CAft su critica, minister di husticia Andin Bikker (POR) a yega di enfatisa den pasado cu Aruba no tin hopi hurista cu ta specialisa den traha ley, cual ta haci e procedura di trahamento di ley uno cu ta tarda na Aruba.

Gobierno lo ‘cobra hopi placa’ pa licencia.
Splicando con gobierno lo logra haya e entrada aki, Wever-Croes a indica tin proyecta cu pa tercer of di cuater cuartal di aña lo introduci e legislacion necesario pa haci e cultivo di cannabis cu fin di exportacion como producto medicinal. Mirando con halto e suma lo ta pa haya e licencia aki, cual prome minister a yama e license fee, sin specifica con caro esaki lo ta, lo yega na e placa proyecta di 15 miyon. “Gobierno ta bay cobra hopi placa pa e licencia aki”, Wever-Croes a indica. E rason dicon prome minister ta haya e licencia mester ta caro, ta pasobra gobierno ta core riesgo si cualkier cos pasa cu un plantacion. “Si algo pasa un hende cu ta cultiva, ta gobierno ta sinta cu e problema”, e prome mandatario a bisa.

Adicionalmente e mandatario a indica cu mirando cu ta trata di operacionnan cu lo ta bay ta basta amplio, unda lo tin cu importa hopi material manera green house, tur esaki tambe ta crea entrada adicional di invoerrechten, ademas di e trabounan adicional cu esaki lo crea cual lo genera mas entrada di loonbelasting. Sinembargo, pa e prome aña cu esaki lo ta legal, e entrada lo bin primordialmente di e licencia, y posiblemente un parti di e invoerrechten.

Condicion estricto.
Con esaki lo mustra, e prome mandatario tambe a splica, bisando cu e facilidadnan unda lo cultiva cannabis lo ta ‘manera un estilo di bunker’, entre otro pa via di siguridad, mirando cu loke lo crece aya den lo ta hopi valioso y pa asina sigura cu tin un bon control riba e matanan pa sigura cu no cualkier hende por bay haya acceso na loke lo crece.