Minister Otmar Oduber, encarga cu Infrastructura y Medio Ambiente, ta enfoca riba e importancia cu e Wetlands/Salina tin riba nos flora y fauna, pero tambe pa nos como ciudadanonan. Esaki segun e relato cu Bon Dia a ricibi di gobierno.
Cada aña ta celebra ‘World Wetlands Day’ riba dia 2 di februari. E tema di e aña aki ta: ‘Wetlands for a sustainable Urban Future’. En conexion cu e dia aki, minister Oduber ta haya sumamente importante pa trece luz riba e importancia di e dia aki.
Tur aña riba e fecha aki ta conmemora firmamento di tratado di Ramsar na e ciudad Iranes Ramsar den aña 1971. Den cuadro di esaki tur aña ta scoge un tema di enfoke. E aña aki e tema di conscientisacion tin un enfoke fuerte riba e balor di Wetlands den area hopi pobla/urbano, e relato ta bisa.
Kico ta Wetland?
Un Wetland ta un area/tereno cu ta satura cu awa, sea permanente of durante cierto temporada of ta inunda frecuentemente.
Segun e relato un di e puntonan cardinal ta cu den e area urbano, un Wetland/Saliña no ta un asina yama ‘waste land’, pero un area extremadamente valioso pa nos medio ambiente pa diferente motibo: Reduccion di inundacion den e areanan aki, por ehempel corda situacionnan di inundacion den pasado den area di Palm Beach Noord. Tambe biodiversidad y area na unda hopi especie di Aruba, pero tambe pafo di Aruba ta bishita y biba y flora y fauna. Wetlands ta promove bienestar di e ciudadano y ta mehora calidad di aire den area cu un densidad di poblacion halto.
E combinacion di nos rooi nan, tankinan, saliñanan, Bubali Plas y Spaans Lagoen ta forma base di e infrastructura muha di Aruba. Awa no ta yobe tur ora na Aruba, sinembargo ora cu awa yobe e ta basha hopi den un tempo relativamente corto, cual sa causa inundacionnan. Den e caso aki e funcion di e areanan menciona ta pa gara y maneha e capacidad di awa. Tin diferente tipo di saliña na diferente sitio y como tambe den area mas pobla manera area di hotel.
Mundialmente paisnan cu ta wordo considera rico y cu ta den adelanto, ta paisnan cu banda di e importancia di e aspecto economico, ta enfoca tambe riba biodiversidad di e medio ambiente. Realidad ta cu e crecemento di poblacion, urbanisacion y necesidad di espacio, careteranan entre otro, ta pone hopi presion riba e infrastructura acuatico rond mundo y na Aruba tambe.
“Considerando e reto aki, ta importante pa crea conscientisacion tocante e balor di e areanan aki”, segun e minister.
