E ta un planoloog y cientifico den desaroya ideanan y plannan pa mehora y ordena espacionan publico pa ofrece mihor calidad di bida na ciudadania. Mr. Mike Eman su deseo pa desaroya plannan pa mehoracion di barionan, centronan di ciudad, conexion entre waf crucero y centro di ciudad, areanan publico pa ciudadania por cana, topa otro y disfruta di compania di otro ta locual a trece Bertus Cornelissen Aruba. Eman a realisa e cooperacion aki cu Cornelissen promer cu e tabata Promer Minister, den e tempo cu tabata prepara plannan di partido pa Aruba.
Awe Bertus Cornelssen ta Wethouder na Putten pa e partido Christen Unie, encarga cu e cartera “Ruimtelijke ordening bebouwde kom, Volkshuisvesting en wonen, Duurzaamheid, Landschap en water”. For di planoloog den servicio di Ruimtelijke Ordening den administracion na Hulanda awe e mes ta un gobernante cu specificamente e carteranan aki.
E dos politiconan, Statenlid Eman y Wethouder Cornelissen a bolbe haya e oportunidad di topa otro durante e mision di e delegacion di AVP na Den Haag. Tabata manera ayera cu nan tabata kibra cabes hunto pa mira con ta bay renoba barionan na Aruba, centro di ciudadnan Oranjestad y San Nicolas y desaroya areanan publico ,manera linear park, plasanan y looppadden.
Wethouder Cornelissen ta hopi orguyoso di a contribui na e plannan di mr. Mike Eman y su team e tempo ey pa realisa e mehoracion aki den calidad di bida di e pueblo di Aruba. Locual ta hacie mas feliz ta cu hopi di e plannan aki realmente a keda realisa tambe cu renobacion di hopi bario y centro di ciudad y e areanan publico durante gobernacion di Promer Minister mr. Mike Eman. E ta admira tambe cu esaki a wordo haci e tempo ey den bon consulta cu e comunidadnan, manera Bertusa enfatisa: “samen met de mensen”.
Cornelissen ta apoya tambe e pensamento di institucion di un Sociaal Cultureel Planbureau pa Aruba. E ta bisa cu gobernantenan tin cu tin bista pa e “brede welvaart” esey ta mira mas leu cu un cifra economico. E Wethouder di Putten ta bisa cu ta importante pa monitor con ta para cu e situacion socio economico di e pueblo, e calidad di enseñanza, e calidad di cuido medico, e tema di energia, tur esaki tin di haber cu e “bestaanszekerheid” di e ciudadano cu mester keda haya atencion. E plan di Eman pa realisa un Sociaal Economisch Cultureel Planburea ta bay duna e analisisnan importante aki. E dos dirigentenan politico a acorda di lo keda den contacto estrecho pa por intercambia di ideanan nobo pa futuro relacion entre Hulanda y Aruba. Wethouder Cornelissen ta mira den e vision di Eman pa Aruba tin un “brug functie” pa Hulanda den regio ainda oportunidadnan grandi pa un desaroyo cu ta beneficia ambos Pais.
