Ayera den oranan di mainta a tuma luga un protesta dilanti Parlamento di Aruba di parti di werksternan di SKOA. Presidente di sindicato SEPPA, Magaly Britto, ken ta representa e grupo di trahado aki tabata presente hunto cu e werksternan y a splica na medionan di comunicacion local presente e motibo y meta di e protesta aki.

“Awe nos t’ey un biaha mas cu e grupo di werksternan. Nos tin cu bisa cu lastimamente pa e grupo di trahado aki ainda no tin claridad kico ta e posibel solucionnan pa e situacion cu nos a bin ta luchando pe desde final di 2019 caba”, Britto a señala.

El a sigui splica cu nan tabatin encuentronan cu minister di Enseñansa unda el a indica tur locual e ta bin ta haciendo. Pero pa e grupo di trahadonan aki gobierno a bisa cu den 30 dia e lo tin resultado di trabou di un comision. Manera ta conoci e comision a tarda y aworaki, durante e tratamento di presupuesto di enseñansa, ainda e grupo aki no tin claridad kico ta bay susede. “Mi ta kere sigur ni e fundacion mes, nan dunado di trabou, esta SKOA, no tin claridad kico ta bay sucede cu nan”, el a expresa.

Segun Britto a subraya e werksternan ta hopi preocupa pa motibo cu tur cos ta indica cu sin un solucion e peso di e problema aki ta bay cay totalmente riba nan y esaki ta e miedo cu nan tin. E miedo pa perdida di cupo di trabou, pa perdida di un entrada cu ya caba ta minimo. El a sigui splica cu den e temponan aki naturalmente trabou ta dificil pa haya y mas ainda trabounan cu por lo menos un persona por genera un tiki entrada pa sobrevivi pasobra e trabounan no ta ni sikiera bon paga.

El a bisa tambe cu e werksternan ta den un situacion hopi fastioso pa motibo cu tin basta trahado a bandona e servicio pa falta di claridad. E trahadonan cu t’ey ainda tin hopi di nan cu ta trahando nan so cu cantidad grandi di klasnan, di baño y otro lokaalnan pa haci limpi y esey ta haci cu nan ta trahando hopi mas duro cu normal.

Fuera di esey, el a remarca cu pa falta di placa y pa falta di claridad di kico ta wordo cubri y kico ta nan derechonan, tin condicionnan di trabou cu na e momentonan aki e trahadonan no ta ricibiendo, compensacion pa por ehempel placa di yiu cu tabata algo cu normal nan tabata ricibi y ya no ta ricibiendo mas.

“E problema aki ta keda bira dia pa dia mas grandi y awe den un forma dicidido nan t’ey atrobe pa bisa tende, wak nos, ainda despues di tanto promesa”, Britto a expresa.

El a recorda cu 23 di juni Gobierno di Aruba a manda SKOA un carta caminda nan a indica cu nan ta bay di acuerdo cu e trabou di e comision anterior, forma pa ex-minister di enseñansa, cu tabata consisti di SEPPA, un representante di gobierno y mediador di gobierno cu a elabora posibel solucionnan.

“Gobierno ta informa cu SKOA dia 23 di juni a bay di acuerdo cune y aworaki bo ta wak cu nos ta casi yegando un di juni, un aña despues, nada no a sosode y nos no ta mira cu aworaki nan no tin ni sikiera un solucion riba mesa pa asina e trahadonan aki por ta trankil”, el a agrega.

Britto a enfatisa cu e yamada di SEPPA y di su miembronan ta pa e solucion bin di parti di gobierno pa loke ta trata claridad, kico ta bay wordo cubri, etc. pa asina evita cu SKOA mester bay den e direccion di subi schoolgeld di alumnonan. El a señala cu por ta cu algun hende lo por interpreta un decision asina manera extremo, locual el a menciona, nan ta compronde pasobra e ta duna e mayornan hopi mas gasto.

Na mesun momento el a subraya cu nan ta mirando cu diferente otro scolnan, fundacionnan cu no ta SKOA solamente tambe a bay over na aumenta schoolgeld, pero esaki, el a enfatisa, ta motibo pasobra no tin claridad di kico gobierno ta cubri y e normbedragen no ta cuadra mas cu e realidad di awendia y esey ta obliga e diferente directivanan di scolnan pa hisa e schoolgeld.

“Claro aworaki mas cu nunca e scolnan mester ta limpi, aworaki mas cu nunca a keda demostra cu e werksternan ta forma parti esencial den e veld di enseñansa y p’esey tambe ta bon pa menciona cu na scolnan tin e apoyo di tur e docentenan cu ta mustra cu awe nos tur ta di luto pasobra awe ainda no tin un solucion”, el a señala.

Di parti di SEPPA, Britto a destaca, cu nan lo keda boga pa gobierno hunto cu SKOA y SEPPA, cu ta representa e grupo di trahadonan aki, yega na un solucion pa tin claridad y e trankilidad necesario bao di e werksternan, “nan no por sigui lanta tur dia sin sa kico ta bay sucede y e situacion aki nos kier pa caba finalmente”.

E idea di e protesta dilanti di Parlamento di Aruba durante e tratamento di presupuesto, Britto a splica, ta pa Gobierno di Aruba wak cu e trahadonan t’ey un biaha mas pa recorda nan, “hey tende, boso tur eyden tin tur informacion kico ta pasando, no ta di awo, ta for di basta tempo caba y aworaki nos ta spera cu den tur boso discursonan bunita, trece amienda aki, aya, stop di haci wega bunita y cuminsa pone solucion na mesa pa e hendenan aki cu tin derecho y nan merece e respet di un trahado digno y cu un entrada cu nan por lo menos por sobrevivi”, el a sostene.

Presidente di sindicato SIMAR, Josephine Albertus, tambe tabata presente durante e protesta y el a declara cu SIMAR tabata pa mustra sosten na e lucha largo di e werksternan pa haya claridad ariba nan situacion. “Cada trahado, no solamente den veld di enseñansa pero unda cu ta tin e derecho pa tin claridad riba su posicion huridico”, Albertus a indica.

“Nos tin akinan werksternan cu apesar cu nan no tin claridad, apesar cu nan tin tanto luna caba sin tin informacion of sin tin aportacion na nan pensioen, nan AZV, na nan loonbelasting, nan ta cumpli tur dia. A yega momento aworaki tambe pa cumpli cu nan pasobra nan a cumpli apesar di tur cos y e no ta husto cu nan tin cu keda cumpli”, el a agrega.

El a señala tambe cu loke ta lastima ta cu no solamente a bisa e werksternan cu lo bin cu un solucion, pero nan a ricibi esaki por escrito pa no preocupa y ya 1 di april 2022 a yega y ainda e werksternan no tin claridad.

Albertus a menciona tambe cu aworaki ta haci como si fuera ta door di e werksternan mester subi schoolgeld, door di nan mayornan tin cu bay paga mas, pero esaki ta algo cu no ta encera e werksternan solamente, e ta encera mayor, e alumno y comunidad henter. “Nos tin cu bin cu un solucion”, el a finalisa.