Politica guia pa principio, ta un politica cu ta produci desaroyo, prosperidad colectivo y oportunidad pa tur cu tin ambicionnan grandi. Politica tin e poder pa transforma sociedad. Den transcurso di epoca politica a diversifica internacionalmente y no semper cu e consecuencia desea.

Principionan manera solidaridad, convivencia, equidad y responsabilidad colectivo a wordo sacrifica pa crecemento economico desbalansa, bataya pa poder y mal uzo di poder pa beneficio personal. E sintoma di e politica deficiente aki tambe nos ta experiencia na Aruba. Ta momento pa politica na Aruba wordo guia pa e Bon Comun cu ta trece desaroyo positivo pa cada ciudadano, di tal forma cu tur ciudadano ta sinti cu su necesidad ta wordo sirbi pa un politica cu ta pone causa colectivo prome cu interes personal. Aruba mester reconcilia bek cu e “BON COMUN” cu ta inspira cada actor principal den nos comunidad pa duna nan aporte na un causa comun nobo. Cada sirbido publico of esunnan cu ta aspira un funcion politico mester compronde e rason pa cual nan ta yama pe. Meta di un politica etico y servicio publico semper mester ta relata na un causa husto. For di principio di pensamento riba politica y servicio publico a busca un cuadra di referencia etico y husto pa ta e guia y e cuadra dentro cual ta duna contenido na accionnan di politica y servicio publico. Hopi ta e discusionnan tocante reforma economico, reforma social y te hasta reforma democratico, manera nos ta mira relata na e discusion tocante e implementacion di e Landenpakket pero e discusion cu lo conduci na transformacion di nos sociedad ta completamente ausente. Nos tin cu habri e discusion tocante e reforma di e pensamento politico y moral cu lo ta e punto di orientacion pa tur decision politico y maneho riba tur tereno.

Pa garantisa cu nos comunidad tin un speransa nos mester impulsa temanan manera E Bon Comun como guía pa maneho. E bon comun ta similar na e aspiracion colectivo di nos comunidad. E beneficio di cada decision tuma mester wordo sinti pa tur hende, y no un grupo specifico; un maneho economico cu ta crea oportunidad y miho condicion laboral pa tur comerciante y empleado, un infrastructura y espacio publico cu ta ofrece oportunidad comercial y recreo tur cu ta desea di utilisa esakinan, un sosten social cu ta garantisa dignidad esunnan mas vunerabel y un enseñansa cu ta garantisa un formacion completo intelectual y personal di nos hobennan.

Ta momento pa cambio e tono politico y enfoca ariba un politica constructivo cu ta inspira y crea speransa. Fundacion Digna Lacle Herrera conhuntamente cu Plataforma Hobennan Profesional y fraccion di AVP a tuma iniciativo pa nos reflexiona ariba idealnan politico cu ta duna un base na e transformacion di nos comunidad cu nos ta desea. Nos orientacion ta inicia diahuebs awor 29 di September pa 7or di anochi den e AULA di EPI. Un invitacion special na tur sector den nos comunidad y tur ciudadano cu ta desea di enrikece nan conocemento y cera conoci cu e concepto politico “ The Common Good”.