Trahadonan di Stichting voor Verstandelijk Gehandicapten Aruba (SVGA) a protesta ayera mainta. Nan a welga pa motibo di falta di empleadonan cual ta un problema cu segun e director, nan tin pa basta aña caba.
Empleadonan di SVGA a welga ayera na seccion di Cas Sjabururi. Director di SVGA, Els van Homelen a splica cu Cas Sjabururi, unda nan tin hende pa cuida cu ta biba eynan, tin hopi aña caba cu falta personal. “Nos a pidi gobierno extra personal cual nos no a haya te awe. Dos siman pasa a sosode un incidente basta fuerte. Awor empleadonan ta cansa y ta bisa cu realmente no por warda mas y mester mas hende pa atende cu e clientenan. Nan no ta sinti nan mes safe. Pues e ta un situacion basta fastioso,” e ta bisa Bon Dia. Directiva a ofrece, mientras tin formacion di gobierno nobo, pa haya algo mientrastanto, pero empleadonan kier por lo menos dos hende extra den tur funcion.
Despues di un candela cu a causa basta daño na un di e seccionnan, esta Pasadia Briyo di Solo, e ta bira mas dificil pa acudi cu mas problema cu lo mester solucion financiero. “E situacion financiero di e fundacion no ta duna luga pa nada extra. Esey ta hopi dificil. Nos ta wardando reunion cu minister Bermudez cu a bisa cu e lo atende cu nos. Mester wak kico por wordo haci di biaha of kico ta posibel. Pasobra ta birando di mas.”
Segun e calculacion riba normanan internacional, nan lo mester un trahado y mey segun e director. Pero manera menciona, e empleadonan ta exigi pa tin dos hende extra. “Nan kier mas eigenlijk locual ami por atende cu ne a base di calculacion. Pa motibo cu tin hopi hende pa cuida, e ta un poco fastioso. Pero nos a pidi e aña pasa caba y te awe nos no a haya contesta di esey. Mi ta spera e wordo trata cu urgencia awo,” sra. Homelen ta expresa. SVGA ta premira cu si minister no duna un contesta cu e empleadonan ta contento cu ne, e ora e accionnan probablemente ta bay sigui.
Cas Sjabururi
E seccion aki a wordo funda na 1988. E tin como meta pa guia pedagogico y guia den cuido pa desaroyo y mantencion di su habitantenan di cuido special. E habitantenan ta personanan cu tin limitacion intelectual y pa motibo di diferente motibo nan no por biba mas na nan cas. E edad di e habitantenan tambe ta varia. Esaki ta entre 18 bay ariba. Durante e siman e habitantenan ta bishita e pasadia pa adulto Briyo di Solo y centro di entrenamento Man na Obra.
