Nicaragua a manece ayera cu un welga nacional, un protesta contra presidente Daniel Ortega, di ken oposicion a exigi e liberacion di e ‘presonan politico’ y respet pa derechonan humano.
Aunke gobierno a menasa pa tuma medidanan contra e negoshinan cu uni e paro nacional di actividadnan, e ceramento di negoshi a keda evidente, aunke no den su totalidad, na e prome oranan di dia.
E welga nacional tabata na ciudadnan manera Camoapa, Chichigalpa, Chinandega, Ciudad Sandino, El Viejo, Granada, Jinotepe, León, Nueva Guinea, Managua, Matagalpa y Tipitapa.
Mayoria di negoshi cu tabata cera den oranan di mainta tabata esunnan di grandi y mediano empresanan, contrario na e negoshinan chikito cu si a habri nan porta.
E welga nacional di 24 ora, a ser convoca pa e opositor Alianza Civico pa Husticia y Democracia, despues cu un ‘preso politico’ a muri den un prizon despues di haya un tiro di un custodio den circunstancia no specifica. Nan ta reclama cu gobierno no ta cumpli cu e compromiso cu a firma na mesa di negociacion, entre nan, e libertad di e presonan y e respet pa Constitucion.
E suspension di actividadnan, cu ta conta cu respaldo di casi tur sector social y economico di Nicaragua, ta inclui negoshinan cu no a cera nan porta pa miedo di represalia. Nan tin como lema ‘os ta bay welga pa libertad di tur’.
Esaki ta di e cinco welga nacional di e Nicaragueñonan contra gobierno di Ortega den 13 luna, di cual 4 a consisti di e suspension di tur actividad economico y social, y un di nan tabata como welga di consumo, cu a produci e mesun efecto.
