Un accion di empleadonan di departamento di inmigracion conoci como IASA lo ta na caminda, asina presidente di STA Diego de Cuba ta declara na Bon Dia Aruba prome cu el a drenta un reunion cu minister di Husticia, Arthur Dowers ayera.
E sindicato kier tur cos pendiente cu e trahadonan di Inmigracion regla den 7 dia, sino nan lo pone accion riba aeropuerto. Nan ta un grupo di 55 trahado di e departamento di Inmigracion.
STA ta representa mayoria di e trahadonan di e departamento aki. “Tin hopi cos cu ta pendiente y nos kier tur e cosnan aki regla”, segun sr. De Cuba.
Trahadonan di Inmigracion
E delegacion di STA tabata dicidido pa regla tur nan asuntonan. E sindicalista a indica cu nan a reuni cu mayoria di e empleadonan di inmigracion. “Nan a bisa nos cu si nos no ta haya e cosnan aki regla den un siman por bay tin problema den inmigracion. Nan ta dispuesto pa pone e trabou abou.”
P’esey den e reunion cu nan a sostene den ora di merdia, STA tabata spera di resolve tur nan impasse, ya cu nan ta considera un falta di respet total di parti di e ministerio di Husticia caminda departamento di Inmigracion ta resorta. Sr. De Cuba ta pronostica prome cu e reunion cu esaki no lo ta nada facil ya cu el a bisa cu STA ta bay ta hopi ‘streng’ na mesa.
E departamento di Inmigracion tin personal den tur terminal di yegada y salida di hendenan ya sea aeropuerto, waf di Barcadera, waf di Oranjestad. Nan no ta contento cu e situacion cu nan ta pasando aden, ya cu nan ta sintiendo un negligencia di ‘marca mayor’ di parti di minister di Husticia.
“Nos ta wak cu tin cosnan cu ta wordo haci na otro departamentonan cu ta cay bou su ministerio, pero IASA practicamente a keda manera un yiu bandona”, asina e lider sindical ta declara. STA a yega di manda varios biaha carta pa e minister y pa hefe di Inmigracion Gerald Vingal durante e tres ultimo lunanan, y finalmente ayera na a haya oido.
Ayera e lider sindical ta expresa su satisfaccion di por reuni hunto cu minister Dowers y sr. Vingal pa nan por papia ariba tur e asuntonan cu tin pendiente entre otro nan tin promocion di personal pendiente, tambe lesnan y cursonan cua keda pendiente y cu no a wordo duna mas.
Happy Flow no ta regla
Tambe e situacion di uzo di e sistema Happy Flow cu nan a introduci na aeropuerto sin cu esaki ta reglamenta ainda. “Nos no sa si den ley e cos aki a keda regla”, sr. De Cuba ta bisa. E sindicato ta mira cu e sistema aki ta uno ‘masha bunita’, ya cu e ta yuda cu e fluho di pasahero pero e punto ta: con leu e ta regla den ley. Y si e ta regla den ley mes, si e forma cu nan ta aplica na aeropuerto ta cumpli cu e ley.
Bon Dia Aruba lo sigui riba e topico aki y sigur tambe lo trece e banda di minister Dowers y/of gerencia di Inmigracion.
