Casi dos ora y mey a tarda e caso sumario cu gobierno hunto cu Camara di Comercio (KvK) y ATIA a entabla contra Sindicato di Aduana di Aruba (SADA) pa lanta e welga cu duaneronan a cuminsa ayera mainta. Despues di scucha tur argumento cu e abogadonan di ambos partido a trece dilanti, Hues tabata determinante den su decision.

E no a pidi pa SADA lanta nan accion di biaha –a pesar cu abogado di gobierno a pidi pa e accion wordo lanta pronto- sino SADA tin cu instrui su miembronan pa bay traha bek den nan respectivo puestonan awe 6’or di mainta. Tambe Hues a duna un termino di 30 dia pa ambos partido por yega na otro riba e convenio gubernamental di structura salarial y salarishuis pa e cuerpo uniforma aki. Un decision cu SADA a delibera cu su miembronan ayera nochi.

Cu e accion aki duana kier a mustra cu nan ta hopi rabia, y hues a haya e señal cu nan a manda pa gobierno ta uno importante, el a pone enfasis riba dje. P’esey den e decision di Hues -segun abogado De Sousa- a laga duana sigui welga te awe mainta. Pues hues no a dicidi di manda SADA lanta nan welga di biaha. Tampoco cu e duaneronan mester cuminsa traha di biaha, pasobra el a haya e caso aki suficiente serio.

Tanto Presidente di SADA, Edward Maduro, como nan abogado De Sousa a haya cu e decision di Hues a mustra cu ki seriedad cualkier organisacion of inversionista por sinta negosha cu gobierno y bin cu un ‘convenant,’ mientras cu e pregunta cu ta keda atras ta, si berdaderamente gobierno lo bay cumpli cune. E Hurista a bisa cu Hues tabata hopi cla pa puntra con serio gobierno ta na momento cu ta firma un convenio, y si e ta bay cumpli cune cabalmente. Ya cu un echo asina tin mas repercusion cu simplemente e caso aki.

 

A pesar cu Minister di Finansa a yega di declara cu e suma a wordo presupuesta, durante e caso sumario e hurista di gobierno a bisa cu esaki no tabata e caso. Despues e consehero di minister a indica cu e suma a wordo aloca como un reserva. Pa abogado di SADA, si e suma a wordo aloca no ta un sorpresa pa diripiente gobierno ta haya su mes confronta cu un suma extra cu nan tin cu saca pa cumpli cu un convenio gubernamental cu ta data for di dos aña caba.

Camara di Comercio

Di otro banda, Camara di Comercio di Aruba (KvK) a haya e accion di SADA no responsabel. Presidente di KvK, Kawish Misier, a bisa cu tin 17 mil negoshi cu ta wordo perhudica pa e accion di SADA. “E welga aki ayera nochi nan a bin cune y awe mainta nan a cuminsa welga,” el a bisa. Pa KvK e welga aki tabata uno desproporcional, caminda e sindicato a haci uzo di e derecho di welga cu ta e ultimo recurso. Sin tene cuenta cu tur e companianan cu ta wordo perhudica, ya cu tur e frutanan y berdura ainda ta den waf.

Mediador di Gobierno

Durante e caso sumario Mediador di Gobierno, Anselmo Pontilius, a duna su conseho pa atende e impasse cu a surgi, despues cu gobierno a informa SADA cu no tin espacio financiero pa cumpli totalmente cu e convenio gubernamental di 2 aña pasa; y cu gobierno a priminti di cumpli cune.

Mediador den su conseho a bisa pa hiba e partidonan na mesa bek. “Den cualkier conflicto finalmente na mesa bo tin cu bay atende,” Pontilius a declara. Na final el a sugeri dilanti Hues pa por nombra un mediador particular pa atende e caso aki, ya cu e ta haya cu esaki ta un situacion den cual bo tin diferente opinion y diferente punto di bista. Igualmente tin consehonan legal tambe di nos organonan importante manera Raad van Advies (RvA).