Harvey Weinstein a keda sentencia na 23 aña di prison pa violacion y agression sexual, algo cu e cantidad di acusador di e mogul di Hollywood a kere cu nunca nan lo mira.
Weinstein, acusa di viola decenas di muhe, a keda declara culpabel pa viola un actriz den un camber di hotel na New York na 2013y di sexo oral forsa cu ex- assistent di television y cine Mimi Haleyi na su apartamento na 2006. E tabata enfrenta un maximo di 29 aña den prison.
Ambos muhe a confronta Weinstein na corte despues cu nan testimonio a yuda seya su condena durante e historico huicio. “Violacion no ta solamente un momento di penetracion. E ta pa semper”, segun e acusador di 2013.
AP tin un politica di no nombra victima di abuso sexual sin consentimento. E victima no a keda identifica.
Weinstein ta insisti cu cualkier actividad sexual tabata cu permiso. E no a mustra ningun tipo di reaccion pa sentencia. Anteriormente el a kibra su silencio den corte cu un suplica pa piedad den cual el a bisa cu su ‘empatia a crece’ desde su caida. El a bisa corte cu e ta ‘arepenti pa e situacion’.
Mas di 90 muhe, incluyendo Gwyneth Paltrow, Salma Hayek y Uma Thurman, finalmente a presenta pa acusa Weinsten di abuso y acoso sexual. Otro tres caso di abuso bou investigacion di departamento di polis di Los Angeles y polis di Beverly Hills por nifica cu lo confronta cargo adicional. No a proporciona detaye di e casonan aki.
