Wega cu cifra ta yega su culminacion?

E ultimo carta di CAFT no ta laga nada na imaginacion. Cla y raspa ta pone riba mesa kico ta e asunto cu mester atende: e contradiccionnan entre presupuesto y e analisis di riesgo, cu aparentemente tin diferente autor. Aunke esey por ta e caso, ora nan yega na man di esun cu ta responsabel politicamente pa ambos, lo mester a ripara e discrepancianan prome cu confronta CAFT y gobierno Hulandes cu e resultado. Y ya cu ta trata di un ‘eminencia gris’ ora ta papia di asunto financiero, ta imposibel cu e discrepancianan aki por a scapa di atencion di e mandatario.

Prome e asunto di e proyeccionnan presupuestario exagera. Ta parce cu e maña bieu di no tuma e cifranan real di un aña anterior como base, no a termina. Den e caso aki ta bisto cu a djis tuma e presupuesto 2015, pone un porcentahe riba esey, bira tuma esun di 2016 y aument’e cu otro porcentahe pa 2017. Asina cualkier ‘dream team’ di cualkier scol basico por a traha proyeccion despues di nan prome les di porcentahe. Realidad ta parce di no ta relevante den e asunto aki.

Aparentemente no a haci ningun esfuerso pa averigua si e aumento grandi di por ehemplo loonbelasting ta cuadra cu realidad. Un ehemplo pa mayor claridad. Si bo loonbelasting crece cu 15%, y e structura di salario promedio pa e cuponan nobo no ta tanto diferente cu pa e alrededor di 55.000 empleado cu nos tin na Aruba caba, kico por spera? Si nos bisa cu 15% di aumento di loonbelasting ta bin di 10% di aumento di empleado, nos ta papiando como 5500 empleado mas. Si e refineria na su punto maximo di actividad di rehabilitacion ta emplea 2000 hende, cifra di esnan envolvi mes, unda otro e resto grandi ey ta bay haya trabao? Nunca e ‘spin off’ den resto di economia di e refineria den su fase di rehabilitacion por ta asina grandi cu ta duna empleo na tanto hende. Di turismo tampoco por spera e tipo di milagro aki, sigur no den e coyuntura actual, unda logicamente a perde un gran parti di e mercado Venezolano. P’esey tambe cu e cifra calcula pa e analisis di riesgo ta bastante realistico na Afl. 4 miyon, mientras cu e aumento di proyeccion riba proyeccion den presupuesto ta duna e cifra di Afl. 309 miyon, mientras cu lo mester ta contento caba si pa 2017 yega na e proyeccion pa 2016 di Afl. 270 miyon.

Pero den e edicion awe nos no ta bay full den detaye tecnico, pero mas den responsabilidad politico. Awor ta sali na cla cu, a pesar di cierto oposicion interno den departamento di Finanza, segun cu nos por a comprende di fuente bon informa, bao di responsabilidad di e ministro encarga a produci cifra pa presupuesto cu ta totalmente ilusorio, mirando e contexto economico di e momento aki. Realmente, den e asunto aki no ta interesante kico e funcionarionan concerni a haci cu cifra o laga. Esun responsabel politicamente mester duna cuenta na parlamento kico finalmente ta e panorama realistico pa cu presupuesto y mas cu tur cos, pa e deficit anticipa pa 2017. Si coregi solamente caba e BBO y loonbelasting pa un nivel mas realistico, ya nos lo ta papiando un Afl. 75 miyon menos na entrada, cual ta algo mas cu 1,5% di GDP nominal. Anto na lugar di yega na 0,5% di GDP na deficit, ta papiando 2% limpi di deficit cu mester financia.

E pregunta grandi ta con un experto financiero manera nos actual ministro encarga cu Finanza ta bin hay’e den un situacion asina, unda e ta responsabel pa cifra asina contradictorio, y cu e agravante cu e no por bisa cu e no tabata sa. Por ta cu el a spera cu ningun hende lo a cay riba e discrepancianan aki? Of por ta cu e ta pensa cu semper e por bisa cu un presupuesto ta, wel… un presupuesto: loke ta supone di antemano. Despues por bay ripara cu e suposicion no tabata corecto, ‘sorry, little mistake.’ Por tin hende contento cu e splicacion aki, pero na Den Haag y na Curaçao (CAFT) nan no ta acepta y CAFT a recomenda caba pa haci adaptacion.

Kico lo ta e consecuencia di tur esaki? Cu lo por bin un ‘aanwijzing’ di Reino pa modifica presupuesto. Esey lo bay bira e siguiente conflicto grandi, cu por involucra e representante di Rey entre nos. Talbes p’esey tabata asina importante pa por tin un gobernador ‘berde’ sinta den e oficina na Aruba? Y pa colmo e candidato predilecto di nos Prome Ministro lo tabata e persona, cu lo a bay laga un presupuesto asina dudoso atras, como su ‘legado’ pa nos?

Naturalmente gobierno no ta den panico. Nan lo sali cu un of otro ‘meevaller’ pa cera aña cu ne. Pa nan mala suerte cos na Venezuela no ta pinta bon pa e proyecto di Citgo na Aruba, di cual por anticipa mas retraso ainda, y menos entrada pa Aruba.  Ta ki propiedadnan lo bende anto?