Durante un conferencia di prensa di Gobierno di Aruba, prome minister Evelyn Wever-Croes a relata e situacion di e pandemia Covid-19 na Aruba, pa e cual na luna di februari nan a mira cierto desaroyo hopi positivo.

El a trece dilanti cu na comienso di februari tabatin 334 caso activo y te diaranson ultimo tabatin 174, loke ta nifica cu esey a baha casi te na mita di casonan.

Pa loke ta trata casonan di persona residente, prome minister a splica cu na comienso di februari tabatin 314 y te diaranson ultimo 141 caso, un reduccion hopi substancial y importante segun el a sigura.

Di e casonan nobo pa dia, el a menciona cu tin casonan nobo pa dia a pesar cu esey ta bahando, e averahe na luna di februari tabata di 35 y te cu diaranson ultimo tabata na 28, sinembargo, el a bisa cu februari tabata e luna cu a haya mas cantidad di fayecido den total tabata 13, igualmente cu luna di september di aña pasa na unda a registra 17 fayecido di Covid-19.

Un otro punto di preocupacion cu prome minister a señala ta hospital, segun el a manifesta pa nan ta hopi importante cuanto persona tin na hospital pa motibo cu eynan no por tin demasiado hende pa por haya cuido, ora luna di februari a cuminsa tabatin 19 persona den hospital y te diaranson ultimo tabatin 27, loke ta nifica cu e cantidad di persona den hospital si ta aumentando “y esaki si ta un motibo pa preocupacion” el a bisa.

Loke tambe ta preocupante ta e variante Ingles, te na cierto momento tabatin registra 14 caso y siman aki a wordo informa cu tin 7 caso adicional, cu un total di 21 caso na Aruba.

“Tur di nan a recupera caba pero nan si ta mustra e presencia di e variante Ingles, cu no ta bayendo sino cu poco poco ta aumentando”, prome minister a afirma.

Di vacunacion, el a sigura cu tin 24.324 persona a wordo registra pa haya e vacuna contra Covid-19 pero e no ta loke tin mester ainda, el a comenta cu nan ta compronde cu hopi hende ta prefera di warda un rato pa mira con e ta desaroya y di e cual te cu diaranson ultimo tabatin 8.882 persona cu a haya nan vacuna caba.

“Esaki ta algo cu mi ta considera hopi importante y e ta mustra dos cos: cu nos hendenan ta tumando esaki na serio y di dos cu nos tin un ekipo y sistema pa procesa tur e peticion”, prome minister a expresa.

Di e 24.000 persona cu a registra, 10.000 ta pertenece na e grupo 60+ pero esey no ta e cantidad cu ainda tin mester y pa e motibo ey el a sigura cu e fin di siman aki nan ta bay haci un campaña agresivo pa registra mas personanan cu edad di 60+, reglanan y e palabracionnan cu Hulanda ta bisa cu Aruba mester usa e vacuna riba e grupo aki prome cu bay na otro gruponan.

Pa otro siman, specificamente diamars e di dos ‘batch’ lo ta yegando na Aruba y esey ta pone cu mas hende por sigui vacuna pero Aruba no tin suficiente vacuna y ta depende hopi di Hulanda.