Diaranson un tribunal Venezolano a ordena e webpage di noticia “La Patilla” pa paga 1. 000 miyon di bolivar, como 500.000 dollar na cambio oficial mas halto, na Diosdado Cabello, un poderoso lider chavista. Mester paga e cantidad aki pa un supuesto daño moral haci contra Cabello.
“Awe a sali un demanda cu mi a presenta contra La Patilla. Mi tin placa awor (…) e decision a conclui cu mi ta haya 1.000 miyon di bolivar, cu e cantidad di placa aki, mi lo paga mi abogadonan y e resto ta pa mucha pober,” Cabello a splica den su programa di TV.
Dia 11 di augustus di 2015 e grupo di abogado di Cabello a demanda e doño, accionista, director y consehero editorial di La Patilla y otro medio local, pasobra nan a publica informacion caminda nan a bisa cu Merca tabata investiga Cabello pa un supuesto relacion cu narcotrafico. “E sentencia aki ta condena e parti demanda (La Patilla) pa paga na e actor demandante (Diosdado Cabello) e cantidad di mil miyon di bolivar como un indemnisacion pa e daño moral cu nan a causa na Cabello,” asina e decision di e tercer husgado di prome instancia Civil, Mercantil, di Transito y Bancario di Caracas ta bisa. Un parti di e decision a ser publica riba Twitter pa e parlamentario di gobierno, Pedro Carreño.
Alejandra Rodríguez, abogado di La Patilla a bisa cu “e accion di publica e contenido di un acto hudicial, mey mey di un controversia, den cual Pedro Carreño no ta un parti formal, ta un acto cu ta haci henter e acto hudicial nulo.”
“Si ta berdad cu e ta e decision di e tribunal, anto ta cla cu na Venezuela no ta existi un separacion di podernan y cu poder hudicial ta un brasa mas di partido socialista uni di Venezuela (PSUV),” el a declara.Portal venezolano de noticias debe pagar casi US$500.000 a conocido lider chavista.
