ORANJESTAD – A pesar cu ainda tin criticanan riba e calidad di awa potabel produci pa WEB N.V, e director di e compania di utilidad aki, Luis Oduber a bisa cu nan por garantisa pueblo cu nos awa ta di calidad hopi halto y continuo.

E planta ta un di e planta mas grandi cu tin den Caribe cu e sistema di SeaWater Reverse Osmosis. E director a bisa cu nan ta controla e calidad di awa constantemente den nan planta na WEB. Tambe e control ta wordo haci ariba diferente punto rond di nos isla. WEB hunto cu departamento di Higiena y laboratorio internacional ta encarga di controla e calidad di e awa cu nan ta produci pa consumo di nos poblacion. “Nos por garantisa cu awa ta continuamente di bon calidad”. E planta tin un capacidad di 44000 meter cubico di awa pa dia.

Den pasado, Sr. Oduber ta admiti cu tabatin retonan rond di e calidad di nos awa pero ya caba pa un periodo largo for di tempo cu WEB a bira un N.V. 25 aña pasa, no tin problema riba e calidad di awa pa bebe. E calidad aki –segun director di WEB- a wordo ratifica door di Nacionnan Uni; Organisacion Mundial di Salud (WHO). “Pa tur hende practicamente. Algun hende kisas no ta di acuerdo, pero nos por garantisa cu e calidad ta bon y coriente tambe mesun cos”, el a declara na Bon Dia Aruba.

Produccion awa y coriente
“E no ta awa puro; ya cu bo no por bebe awa puro.  E ta awa pa bebe, awa potabel di calidad hopi halto”, e directo ta bisa. Pero banda di produccion di awa di forma continuo nan ta produci coriente tambe. E ta bisa cu e suministro di coriente tambe tin su retonan. Pero si nos ta wak di forma general, nan planta ta hopi stabiel danki na decisionnan tuma den pasado y actualmente cu ta garantisa e suministro di coriente. Awendia nan ta produci un averahe maximo di 135 Megawatt pa dia.

Sr. Oduber a indica cu durante e ultimo añanan tabatin hopi reto y hopi contratiempo, pero hopi logro tambe. Den cuadro di 85 aña di existencia di WEB, el a para keto un rato riba nan logronan cu no tabata posibel danki na e trahadonan actual y esunnan cu a baha cu pensioen. E a laga sa cu nos mester ta orguyoso no solamente di e calidad di awa sino di e red di distribucion;  ya cu tur hende na Aruba por dispone di e servicio aki na nan cas. “Nan por habri un cranchi y gosa di dje. Hopi parti di mundo no tin awa; te hasta nan tin cu importa e awa den boter of nan no tin un distribucion continuo.”

Ademas nos ta produci awa a base di proceso di purificacion di awa di lama; kiermen nos no ta confronta e problema cu otro paisnan tin pa causa di contaminacion di nan riu; of pa falta di yobida, etc..

Pago di servicio
Sinembargo e problema ta keda pa e famia di poco recurso cu cada luna ta confronta e problema cu e servicio ta wordo corta pa falta di pago. Riba e punto aki, Sr. Oduber a bisa cu e punto dificil ta cu WEB no ta un compania social sino cu nan ta un compania di utilidad. “Nos no ta haya subsidio y nos mester cubri tur nos gastonan.”

E ta lamenta cu tin clientenan cu pa un motibo of otro nan no por paga nan cuenta. Den un caso asina nan ta recomenda e cliente aki pa pasa departamento di Asunto Social pa expone nan caso. Unabes cu WEB ta wordo acerca door di e departamento di gobierno aki, nan ta yuda e cliente den necesidad.

Tambe WEB ta disponibel pa bay na cas di e cliente cu mester di ayudo pa duna informacion con pa nan spaar awa. “E unico cu por controla e consumo ta esun cu ta uz’e. E control ta den bo man”, el a bisa. Sr. Oduber a agrega cu WEB por yuda e cliente pa spaar riba nan consumo di awa; pero nan no por haci’e pa e cliente. Tin clientenan cu no ta realisa con hopi nan por spaar si nan tuma e control di nan mesun consumo.