Despues cu dia 30 di juni ultimo Aruba a manece cu e noticia cu WEB Aruba N.V. a anuncia aumento den nan tarifa di awa, ayera mainta nan a informa cu den consulta cu accionista Utilities Aruba, a tuma e decision di schors tarifa di awa – pero di manera ‘temporal’.

E aumento aki, segun informacion riba nan rednan social, comunidad mester a cuminsa pag’e den e cuenta di awa di luna di augustus di e aña aki, cu lo caduca na september di 2022.

Pa cu esaki, Gobierno di Aruba a declara cu nan a keda sorprendi pa e anuncio di aumento di tarifa “sin cu Gobierno a duna su aprobacion y mientras cu Gobierno ta den negociacion cu Web y Elmar riba e tema aki. Minister di Energia, Glenbert Croes ta atendiendo e tema aki,” segun un mensahe publica riba red social di Gabinete Wever-Croes II.

Mientras tanto, ayera den oranan di merdia tabatin un reunion na Parlamento di Aruba cu director di WEB Aruba N.V, Alfredo Koolman. Koolman a nenga di duna declaracion na medionan di comunicacion presente pafo di parlamento, cu tabata wardando pa un declaracion oficial di su persona tocante e tema aki.

Riba rednan social e comentarionan a cuminsa surgi, unda diferente usuario a mustra nan mal contento y hasta sigura cu “costo di bida ta sigui subi, pero salarionan ta keda mesun cos”.

Den edicion di Bon Dia Aruba di ayera diabierna a menciona cu Sindicato di Maestronan di Aruba a manda un carta   pa Minister Presidente den nomber di tur nan miembronan y sector di Enseñansa, vociferando nan malcontento y preocupacion pa e impacto cu e aumento aki lo tin pa e clase trahado.

“Tin famianan cu hopi biaha no tin e recursonan, ni cu esakinan ta suficiente. Hopi miembro a indica cu ainda nan ta luchando cu nan finanzas y cu ta haci hopi esfuerso pa yega fin di luna cada luna”, e sindicato ta señala.

SIMAR ta menciona tambe cu e recorte salarial cu tin desde mei 2020 pa sector publico y semi-publico, ta un sla fuerte pa hopi y mas ainda cu tin falta di claridad y tin un gran incertidumbre si realmente e empleadonan aki lo haya e 5% back den luna di juli.

E aumento di tarifa di WEB Aruba, SIMAR ta señala, lo afecta mas ainda e costo di bida. E sindicato ta sigui indica cu ta wordo bisa cu e aumento di costo di bida ta alarmante, pero e impresion general ta cu no ta realisa ningun siguimento extensivo of ta wordo realisa di manera insuficiente den e sector priva.

“Directiva di SIMAR ta lamenta cu e anuncio di WEB lo influi negativamente den e situacion economico di diferente famia cu mester sobrevivi cu tiki recurso. Nos kier señala cu AWA ta un di e necesidadnan primario di e ser humano. Di otro banda e ta indiscutiblemente probabel, specialmente den educacion, cu e problemanan social lo aumenta considerablemente. Ta premira cu e final ainda no ta den bista”, el a agrega.

Pa cu esaki, Gabinete Wever-Croes a duna un contesta na e carta en cuestion, den cual ta indica cu prome minister Evelyn Wever-Croes diahuebs a ricibi un carta di e sindicato di enseñansa, SIMAR relaciona cu cuatro punto di mal contento den e sector di Enseñansa. Prome Minister a contesta e carta mesora, indicando tambe cu e ta considera cu ta importante pa contraresta e puntonan aki inmediatamente.

Aumento di tarifa di awa

Presidente di Sindicato SIMAR, señora Josephine Albertus a elabora riba e aumento di tarifa di awa, expresando cu den e veld di enseñansa tin preocupacion cu e aumento di tarifa manera cu WEB a anuncia diahuebs mainta, lo ta devastador pa hopi famia. Ademas di esaki, señora Albertus a keha cu SIMAR no a wordo envolvi ni informa adelanta riba e aumento di tarifa aki.

Riba esaki, Prome Minister a informa señora Albertus di SIMAR, cu mescos cu señora Albertus, diahuebs mainta, 30 di juni, Gobierno di Aruba desagradablemente a wordo sorprendi cu e anuncio di WEB pa aumento di tarifa di awa sin cu esaki tabatin aprobacion di Gobierno; siendo cu Gobierno ta na mesa di negociacion cu WEB y Elmar riba e topico aki.

Prome Minister a informa señora Albertus tambe cu Minister di Energia, señor Glenbert Croes ta trahando riba esaki pasobra Gobierno di Aruba ta mas preocupa cune, pasobra Gobierno ta preocupa pa henter Aruba y Gobierno ta buscando un solucion.

Recorte di 5%

Riba e di dos punto, señora Albertus di SIMAR ta expresa duda si nan lo haya e 5% back of no. Contestando señora Albertus di SIMAR, a inform’e, mescos cu Secretario di Estado Alexandra van Huffelen y Prome Minister mes tambe den bastante ocasion, y extensamente, den placa chikito, dia 20 di juni ultimo, Aruba ta e unico pais cu a yega na un acuerdo cu Hulanda bao di cua condicion Aruba por cuminsa stop e recortenan. Manera ta conoci, e acuerdo aki a wordo aproba door di Conseho di Minister di Reino dia 24 di juni ultimo.

“Gobierno di Aruba aworaki ta trahando cu tur forsa pa cumpli cu e condicionnan pa asina cumpli cu e plan y e intencion ta pa otro luna, juli, paga e 5% na tur trahado cu di Gobierno y esnan cu ta traha pa fundacionnan cu ta wordo subsidia pa Gobierno.”

Tambe nan a papia tocante otro puntonan di discusion cu SIMAR tin, por ehemplo aumento di prijs di gasolin cu segun Gobierno di Aruba a menciona ta un “resultado di aumento internacional di prijsnan di gasolin y di crudo’. Tambe a haci mencion di areglo di VUT, unda a anuncia cu ta habri un posibilidad pa un areglo pa ambtenaar y a pidi pa Albertus delibera cu Directie Onderwijs pa presenta un maneho bao diferente condicionnan pa por duna VUT na docentenan.