WEB Aruba NV a tuma nota di informacionnan cu a keda publica den prensa online tocante posibel awa cu lo a sali troebel y cu color cu no ta normal for di tuberia di un cas y tambe di caso di awa cu lo ta smaak brak.
“Nos na WEB ta tuma kehonan masha serio. Salud y bienestar di nos clientenan ta nos prioridad principal”, e compania a bisa den un comunicado di prensa. “Inmediatamente nos personal specialisa a forma un team pa bay haci investigacion. Na Primavera a bin constata cu na un cas tin trabaonan andando pa cambia tuberia. A papia cu e personanan na e percela y a bin compronde cu nan ta cambiando e tuberia di e cas di tubonan di Koper pa tubonan hdpe (PVC flexibel) y cu ta nan mes a bay media.
“Nos personal a splica e personanan cu na momento cu ta cambia tuberia, bo por haya e efecto cu e awa despues ta sali temporalmente cu color troebel. Den trabaonan cu tuberia esaki ta conoci como “Water Flushing”. Sedimentonan of mineralnan acomula den e tuberia anterior por a sacudi of move durante trabaonan y por cambia e color di awa temporalmente. Esaki por sosode tambe ora cu tin trilling di e suelo ora cu den vecindario di e tubonan tin construccion of cobamento andando.
“E team di WEB a recomenda e persona pa despues cu e caba di haci tur e cambio di tuberia, pa laga e awa core pa flush out e sistema y si e awa no claria y bira transparente normal e por yama WEB pa bin dune asistencia.
Den caso di cualke iregularidad di awa na bo propiedad, ta importante pa notifica WEB inmediatamente. Tuma contacto cu nos na 280-4600.”
