WEB ta sigura cu por garantisa servicio. Esaki a pesar cu tin un grupo relativamente grandi di empleadonan cu a keda infecta cu Covid19.
Manera ta conoci, ayera WEB a publica un lista di cuanto hende ta infecta cu e virus. Ta trata di 27 trahado di WEB mes y 23 contratista cu ta traha na WEB. WEB mes a publica e lista cu un advertencia cu e control di contagio ta den man di cada trahado.
Segun vocero di WEB, Asja Dongen, “nos por maneha e situacion. For di desde e prome caso. Nos a sigui nos propio crisisplan cu ta conforme tur protocol di DVG, y nos ta comunica intensivamente pa motiva tur persona na WEB pa sigui e reglanan di distancia y higiena y di tapaboca.”
Empleadonan cu por traha na cas ta haci esey, tin control di un task force special riba e medidanan y WEB ta adapta e wardanan di ekiponan di produccion pa por sigui garantisa suministro di awa y coriente pa Aruba. “Nos ta hopi consciente di WEB su rol como compania vital,” Dongen a bisa.
Pa loke ta e publico mes, WEB a ripara cu tin hopi mas hende cu a bin busca areglo di pago. “E pagonan di cuenta ta drenta hopi poco poco y e cantidad di areglo di pago a subi considerablemente,” Dongen a bisa, agregando cu esaki tambe ta un reto pa e compania.
