Gerencia di WEB ta lamenta cu informacion riba e negociacion di e CAO ta wordo saca afo, mientras cu un protocol a wordo firma den cual entre otro a acorda pa no comenta riba e contenido, ni e progreso di e negociacion.
Sinembargo director general di WEB, Luis Oduber a referi na dje durante un conferencia di prensa ayera, mirando cu SIWA no ta atene su mes na e protocol aki. Gerencia di WEB kier aclaria riba e situacion financiero di e compania di utilidad aki.
Oduber a señala cu SIWA ta menciona cu “no ta spera nada pa cu e CAO cu ta bini”. Segun SIWA, gerencia di WEB a bini cu excuus cu “cos ta frega”. El a contradeci e ponencia di SIWA, bisando cu e situacion financiero di WEB ta stabiel.
El a laga sa cu den diferente reunion cu a sostene cu empleado, el a referi cu “e situacion na WEB ta sano” y ta sanea tambe. Oduber a indica cu e añanan di turbulencia financiero entre 2013 y 2014 a keda atras, y cu aña 2015 y parti di 2016 nan a stabilisa financieramente. Tanto asina cu actualmente WEB ta produciendo ganashi alrededor di 40 pa 50 miyon florin. Oduber a bisa cu e ganashi aki ta necesario pa nan sigui inverti.
Rebaho di tarifa
Director general di WEB a anuncia cu nan tin pensa di bin cu un rebaho riba e tarifa di awa. Eventualmente nan ta evaluando cu Elmar si esaki ta factibel pa coriente tambe. El a agrega cu e banconan y financiado di WEB “ta di acuerdo cu e situacion ta hopi bon na WEB. Pues no tin motibo pa trece panico den pueblo innecesariamente”.
Luis Oduber ta splica cu: “Lo cual si nos a bisa SIWA ta cu nos mester hiba un maneho sano pa asina nos por limita e peso riba comunidad. Realidad ta exigi cu nos compania mester bay cu su tempo y mantene su derecho di existencia. Pa keda competitivo riba mercado ta importante pa opera eficientemente y esey pa nos tur ta trece cambio cu ne”.
