Relaciona cu e derame di crudo for di Trinidad cu ta actualmente yegando nos costanan, Bon Dia Aruba a tuma contacto cu WEB pa puntra con nan ta pendiente riba esaki y si a haci algun tipo di sondeo. E compania ta enfatisa cu tur cos ta bao control te ainda. “No tin motibo pa panico.”
Vocero di WEB Asja Dongen ta conta nos cu dialuna nan a instala un extra ‘boom’ cu ta bao di lama na e intake di awa. Pues esey ta adicional na e boom cu t’ey constantemente. “Ademas WEB ta den estrecho contacto cu Bureau Rampenbestrijding pa monitor e desaroyo di e spill. Pa awor tur medida ta tuma y no tin motibo pa panico. Nos awa di bebe ta safe,” sra. Dongen ta bisa.
Test di awa
Instancianan mundial ta prescribi exactamente kico nos awa mag y no mag contene. P’esey segun WEB nan ta test nan awa diferente biaha. “For di cranchi no ta sali niun gota cu no ta cumpli cu standard internacional,” sra. Dongen ta splica den un video educativo di WEB online. Bon Dia Aruba a puntra si sra. Dongen si WEB a test e awanan despues cu e anuncio aki di derame di azeta yegando nos costanan a bira conoci.
Sra. Dongen no a contesta esaki anto a dirigi nos na e video educativo “Pop News” riba frecuencia di test di awa cu nan tin online. Segun experto Noak Martin di departamento di Operacion Distribucion di Awa, tur luna Web ta spula na diferente puntonan strategico rond Aruba y tuma muestranan dia awa pa haci e test parti kimico. Y tambe Salubridad Publico ta haci test pa e parti microbiologico. Ora ta pone tuberianan nobo, ta desinfectanan cu chloor y despues spula nan pa bolbe tuma muestra tanto pa testnan kimico y micro biologico, prome cu e tubo wordo poni den servicio.
Laboratorio WEB
Segun Cristiana Nadal di laboratorio na WEB, ta monitor e awa su calidad durante proceso di produccion y tambe ora e bay den nos red di distribucion. Departamento di Salud Publico ta test e awa rutinariamente cada dos siman pa bacteria na Landslaboratorium. Tur luna ta tuma muestranan na puntonan strategico riba nos isla pa asina controla riba entre otro: nivel di PH, Conductivity, Calcium, Magnesium, Zink y mas.
