ORANJESTAD – Encuanto e hendenan di poco recurso di nos comunidad cu ta confronta problema pa paga e servicio di awa, director interino di WEB, sr. Luis Oduber a laga sa cu tin instancia cu ta encarga cu aspecto social aki.
El a bisa cu WEB ta bende e awa na e prijs cu miho nan por duna, pero den caso cu e cliente tin problema pa paga, tin e caminda pa nan cana, ya sea Departamento di Asunto Social.
Inversion y calidad
Considerando cu WEB ta un compania caminda nan tin inversionnan cu nan ta haci pa suministra e suministro y distribucion di awa na prome luga.
E gastonan pa mantencion di un planta asina ta uno continuo. Igualmente nan ta percura pa ofrece un awa di un calidad halto. Tin testnan cu ta wordo haci ya cu WEB ta un compania cu tin un certificacion di ISO cu ta un instancia internacionalmente conoci riba aspecto di calidad. Pues tur hende mester paga pa e consumo di awa, ya cu nan no ta un empresa social sino uno di utilidad, el a indica.
Ta asina cu e proceso di produci awa, distribui awa y control di laboratorio pa garantisa e calidad di awa tambe ta certifica. Tur esakinan tin su costonan, sr. Oduber a laga sa. Actualmente WEB no tin un plan social pa ofrece awa gratis na hendenan di poco recurso, ya cu si bo ta duna un hende awa por nada, un hende tin cu paga p’e. “Ya e tin cu bin di e saco banda robes of di e saco banda drechi”, el a bisa.
E ta haya cu ta dificil como empresa pa haci un seleccion di e personanan den nos comunidad cu lo haya un servicio di awa por nada. “Como utilidad nos tarea ta di produci awa y distribui awa”, el a bisa. Sr. Oduber a añadi cu tin departamentonan social cu kisas nan mester atende cu e aspecto social, ya cu WEB como empresa no sa si un cliente en berdad tin un problema of no. Ya cu esaki ta un informacion priva di e persona y nan como compania dificilmente lo por husga si e persona ey tin entrada pa paga awa of coriente.
