Prome minister Evelyn Wever-Croes, como minister encarga cu asunto general y di utilidad, no a wordo consulta door di e compania di utilidad WEB pa introduci un fecha nobo di cobransa.
“Pa mi ta hopi honesto cu bo, ami a haya esaki apenas algun dia pasa,” el a bisa. E cambio aki a conduci cu WEB su clientenan – cu ta henter comunidad – mester paga dos cuenta di awa e luna aki.
Ta asina cu clientenan di WEB a haya via post un carta di notificacion of noticia importante acompaña cu un recibo di cobransa di e cuenta di awa di februari 2020, cu ta caduca dia 12 di maart awor. Kiermen e luna aki, e clientenan di WEB no solo mester paga e cuenta di awa di januari 2020 cu a caduca ayera 9 di maart, sino cu mester paga otro recibo di luna di februari cu ta caduca aki dos dia. E decision aki a cay pisa pa e famianan cu no tin e condicion of forsa financiero pa atende cu dos recibo di pago pa e mesun servicio cu tres dia di diferencia riba e ultimo fecha di pago.
Premier Wever-Croes ta haya cu e no a wordo consulta, ya cu nan ta considera cu no ta cosnan cu nan como empresa estatal no mester consulta cu gobierno. El a laga sa cu e compania estatal ta tuma e decision di operacion riba su mes. Sinembargo, e ta haya cu esaki ta un tema pa atende cu WEB, y te ainda e no a haya e contesta riba e decision aki. Tambe otro tema cu e mester consulta tin di haci cu e prijs di tarifa di servicionan publico, awor cu e prijs di combustibel a baha di un forma drastico.
E compania a splica cu na luna di november ultimo nan a informa di e cambio relaciona cu e fecha ultimo di pago, caminda nan ta introduci un fecha nobo, diferente di e fecha fiho custumbra cu tabata dia 9 di cada luna.
E biaha aki e ultimo fecha pa paga e cuenta di februari a bira 12 di maart awor. Y cada cuenta cu lo bini despues ta depende di e dia ariba cual a lesa bo meter di awa den e luna anterior. WEB ta aclaria cu den todo caso, e lo caduca 30 dia despues di a lesa e meter.
Comments are closed.