E aumento di salario di 205 florin pa luna pa 2017 y 200 florin pa 2018 cu e trahadonan di WEB a haya siman pasa, no a cay den bon tera cerca gran parti di nos comunidad.
E criticanan den social media tabata grandi, considerando cu WEB ta un empresa estatal di henter nos pueblo. E trahadonan aki ta bin conociendo aumento automaticamente apart di otro beneficionan y gratificacion di fin di aña cu otro trahadonan di otro sector di nos comunidad no ta conoce.
Mediador di Gobierno Sr. Anselmo Pontilius kende a intermedia entre Gerencia di WEB y sindicato SIWA pa busca un solucion y pa para e welga di tres dia, ta kere cu e companianan estatal mester bin cu un maneho educativo y transparente pa atende cu e asunto aki.
“E maneho mester ta uno hopi educativo y transparente cu e mesun trahado ta bay bisa: Nos no por pidi mas…”, el a declara. Sr. Pontilius ta haya cu aunke e compania estatal aki ta genera ganashi sinembargo mester bin cu otro sistema pa compensa e salario di nan trahadonan.
Inicialmente e trahadonan di WEB pa medio di nan sindicato a pidi entre 250 pa 260 florin di aumento. Despues nan a baha te 225 florin pa aña 2017 y 180 florin pa aña 2018. Pero gerencia di WEB a ofrece 180 florin. Aunke a bin cu un solucion final, e pregunta ta: con e empresa estatal aki ta bay carga e gasto aki di un forma sostenibel y responsabel pa futuro, si no ta bin cambio riba e sistema aumento automatisa di salario. Manera nos isla bisiña Corsou a bin implementando ultimo añanan bahando nan gasto riba pagamento di salario.
Ultimo periodo
Sr. Pontilius a bisa cu esaki ta e ultimo periodo cu e trahadonan di WEB ta gosa di e sistema di automatisacion riba aumento di salario. Pero e ta considera relevante pa e compania bin cu transparencia total y suministra tur informacion pa asina e trahadonan por haya un bista con nan ta atende cu e gastonan.
Un empresa manera WEB tin miyones di inversion pa haci y percura cu nos tin awa y coriente permanentemente. Sr. Pontilius ta haya cu WEB ta haciendo un trabou excelente comparando e nivel y calidad di servicio y produccion di awa y coriente cu otro destinacion den Caribe. Pero e companianan estatal mester percura mas frecuentemente pa e comunidad sa mas riba e maneho di cada florin cu nos tur ta paga y con nan ta wordo uza.
Pero di otro banda pa e trahadonan bira mas consciente cu nan mester percura pa cuida e empresanan aki. “Loke nan tur ta haci, pero cu no por tin demanda nan exagera cu hopi biaha ta exagera pa falta di informacion”, el a declara. Ya cu e ta haya cu finalmente e sostenibilidad di un empresa estatal manera WEB ta un responsabilidad colectivo tanto di sindicato como di gerencia.
