Varios tabata e comentarionan cu construccion y cambionan di infrastructura a causa daño grandi na e mangelnan na Santo Largo, Savaneta. Nos a acerca director di DOW Marlon Croes pa un reaccion riba esaki kende a splica cu e tuberianan aki ta den proceso pa wordo drecha mas pronto cu ta posibel.

“Nos a haci un estudio pa wak kico ta e origen di e problema y den e proceso nos a ripara cu WEB den su trabaonan cu el a haci den curso di april/mei 2016 – cobamento pa instala high tension cables entre refineria cu planta na Balashi – a kibra cierto cantidad di tubonan,” sr. Croes a splica.

Esaki tabata tubonan cu tabata percura pa e awa di lama drenta e tubonan cu tin cu sali pa refresca e awa constantemente.  Den e proceso cu e compania Odinsa a cuminsa traha den e area aki – na maart 2017 – ora cu a ripara cu e tuberia tabata kibra, a dicidi pa drecha e dos tubonan. A pone un tubo extra na mesun altura compara cu nivel di lama, anto un tubo extra pa pump awa for di saliña pa pafo den temporada di awasero.

Si nos recorda november di aña pasa, e saliña a yena practicamente completo cu awa unda cu trafico no por a haci uzo di dje mas. Tur automobilista mester a haci uzo di e caminda principal, cual a trece cu ne cu a perde hopi capacidad y consecuentemente cu retraso den circulacion di trafico entre Savaneta cu Oranjestad.

“Pa via di esey a opta pa pone un tuberia extra bao di e caminda pa pump e awa y mand’e lama sin stroba e fluho di trafico.” DOW a combersa cu WEB algun dia pasa cu mester drecha e tubo cu ta refresca e awa y sac’e pa lama. WEB lo mester ta drechando esaki den e proximo dianan aki segun sr. Croes pa asina wak kico lo mehora.

“E saliña no ta un tereno di pais Aruba cual 50/60 aña pasa tabata opera como un area pa colecta salo. Desde aña 2004/2005 el a crece y bira un mondi di mangel cu nos conoce awe cu tin su bunitesa. E tuberia buta den e temponan aya, no tabata un tuberia cu gobierno a pone. Nunca e tubonan aki tabata riba mapa. Esey ta trece cu ne cu bo por haya tipo di problemanan cu a sosode cu ora WEB a coba el a pega den nan, pasobra no por a identifica nan.”

En tanto mester drecha nan y manera menciona, pone nan na mesun altura cu nan tabata ta tempo cu nan a wordo buta pa garantisa e fluho di awa pa bin den dje segun e director di DOW.

Mangelnan Spaans Lagoen
Un otro area cu a ricibi basta critica for di nos comunidad ta na unda e brug nobo cu ta forma parti di e proyecto green corridor a wordo construi. Segun un comunicado di DOW, dia 17 october ultimo un team di Wageningen Environment Research tabata na Aruba pa asina inspecciona e mangelnan na Spaans Lagoen.

E comunicado ta sigui splica cu Lawrence Jones Walters kende ta hefe di e programa di biodiversidad di Wageningen, a declara cu e ta sumamente contento con e progreso ta bayendo y cu solamente falta algun detayenan chikito pa completa e proceso. Alabes e la comenta cu na ambos banda di e brug di Spaans Lagoen e mangrove ta creciendo fuerte y cu e pasada di awa pa lama a keda garantisa durante ehecucion di e trabao. Tambe e comunicado ta bisa cu segun Wageningen Environment Research, DOW y Odinsa a haci un tremendo trabou pa minimalisa e daño ora cu e brug a wordo construi.

“E iniciativa pa planta e mangrovenan ta importante pa e isla di Aruba pa motibo cu e ta pertenece na naturalesa di e isla y cu ya caba e area di compensacion den Franse Pas ta wordo uza pa parha y pisca. Tambe tin un crecemento natural di mangrovenan preto cu ya a cuminsa crece alrededor di e pasada di awa nobo. Nos ta contento tambe con Parke Nacional Arikok su park rangers a cuminsa planta mangrovenan cora,” asina Lawrence Jones di Wageningen a conclui durante su bishita di inspeccion acompaña pa director di DOW Sr. Marlon Croes, e comunicado ta termina bisando.