WEB Aruba ta duna algun aclaracion riba e situacion di e brug di tubo di Spaans Lagoen. E proyecto di renobacion aki tin un duracion di un aña. Tambe e compania kier a informa comunidad riba un test cu nan lo ta conduciendo diadomingo awor riba nan motornan.

E brug di tubo di Spaans Lagoen ta acomoda y sostene tubonan pa transporta Heavy Fuel Oil (HFO) y awa industrial, pero tambe kabelnan di coriente y comunicacion cu ta core over di e lagun. For di 2017 a planea pa inicia un proyecto di renobacion di e brug aki den di dos kwartaal di 2018. E proyecto lo tin un duracion di un aña. WEB ta bisa cu nan ta ‘aplaudi e preocupacion di comunidad riba e brug aki’. “Pueblo por ta sigur cu lo envolvi expertonan ambiental na momento cu inicia e trabounan di renobacion, pa asina limita e efecto riba nos medio ambiente.”



Urgencia pa renoba

Preliminar na e proyecto, na 2016 a haci estudionan di inspeccion di e condicionnan di e brug pa determina e urgencia pa renoba y tambe pa determina e grandura y tipo di trabou di renobacion. A resulta for di e estudionan e tempo ey, cu e brug por a wanta algun aña mas. Considerando e gastonan grandi envolvi, a dicidi e tempo ey pa pospone e proyecto di renobacion pa aña 2018 segun WEB ta laga sa.

E tubonan cu ta wordo mustra riba e potret, ta e tubonan cu tawata ubica kabel di coriente conecta cu Valero. E tubonan aki no ta contene HFO y no ta den servicio mas. Lo desmantela e tubonan aki como parti di e proyecto di renobacion.

Test control di frecuencia di motornan
Diadomingo 18 di februari proximo, WEB Aruba lo haci un test di control di frecuencia riba su motornan RECIP.  Esaki lo tuma luga entre 8 y 10or di mainta. WEB ta laga sa cu nan a planea e test aki rigurosamente, a pone Elmar na altura y a tuma tur precaucion pa preveni interupcion di coriente. No obstante esaki, den e industria di utilidad, semper tin un posibilidad cu ta sosode algo inespera cu consecuencia cu mester interumpi suministro di coriente. Pa e motibo aki WEB di antemano ta notifica y pidi comprension di comunidad.

E test di control di frecuencia riba WEB su motornan RECIP ta necesario relaciona cu e proyecto IGMS. E proyecto Intelligent Generation Management System ta pa implementa un sistema inteligente pa maneha generacion di energia. Den futuro, e sistema automatisa lo conduci na stabilisacion di suministro di coriente y mas penetracion di energia di biento, solo y otro fuentenan di energia sostenibel.

E test di control di frecuencia no ta un test regular. Ta haci e tipo di test aki solamente ora ta necesario. Si tur cos bay bon, comunidad lo no ripara nada. Sinembargo semper por sosode algo inespera cu toch lo por conduci na un brown out (un interupcion den algun bario so) of den caso extremo, un black out (un interupcion total). P’esey a informa di antemano e sectornan di salubridad, aereo, turistico y comercial y a pidi nan pa tuma medidanan di precaucion.

WEB Aruba tin e confiansa cu e test lo bay bon y cu comunidad lo no ripara nada diadomingo mainta otro siman. “Nos ta gradici un y tur pa e comprension. Sea sigura cu nos teamnan lo haci nan maximo esfuerso pa evita interupcion di suministro di coriente.”