WEB no ta bay duna tur cliente cu retraso den nan pago un advertencia for di diasabra. Solamente esunnan cu tin un debe pa varios luna lo haya e carta. Esaki e compania ta informa despues den prensa a sali cu por tin clientenan cu a paga sinembargo por spera un carta tambe debi na problema cu conexion cu e sistema di Elmar. Pues WEB no tin un bon bista kende a paga y kende no. Tin cliente cu a paga tur cos pero ta mira riba nan cuenta un debe habri ainda.
Awor WEB a comunica cu solamente esunnan cu tin un debe pa un tempo mas largo lo haya un carta. Y e compania ta enfatisa cu lo no bay corta awa di biaha. “Ta pone enfasis riba e hecho cu clientenan cu varios luna di pago atrasa ta e promenan cu lo ricibi carta di advertencia na nan meter di awa. Clientenan cu no reacciona riba e carta di advertencia dentro di 2 dia di trabou ta core e riesgo cu ta corta suministro di awa entrante diaranson 2 di december proximo.¨
Clientenan cu tin un cuenta habri pa un periodo mas cortico, lo ricibi solamente un carta pa recorda di paga cuenta.
