Mientras gobierno a anuncia cu a yega na un tarifa di awa reduci pa cunukeronan, WEB ta bisa cu ainda nan ta den deliberacion cu e diferente gruponan.
Bon Dia Aruba a acerca e compania di utilidad kico e tarifa reduci ta, pasobra esaki gobierno no a divulga den nan comunicadonan. Pero e vocero di WEB no por a duna e informacion aki ainda pasobra ‘actualmente gerencia ta den deliberacion cu e diferente gruponan envolvi pa pronto yega na un plan y tarifa di awa concreto pa e sector di cunukero’.
Pues ainda no tin nada concreto riba con barata e cunukeronan awor lo haya awa di WEB. Pa hopi aña e cunukeronan ta haci peticion pa bin cu un tarifa special pa nan sector. Pero te ainda no a logra. Den pasado nos a puntra WEB dicon no ta bin cu tarifa special y e contesta e tempo ey tabata cu nan tin miedo cu mas sector comercial lo bin cu peticion pa haya awa mas barata. Mientrastanto nan ta keda cu e gastonan di produci awa.
