WEB a brinda informacion y disculpa na comunidad pa blackout di dialuna mainta

Dialuna marduga Aruba completo a experiencia un blackout, scolnan a keda sin habri y varios otro negoshi tampoco por a cuminsa opera mesora, mientras cu e coriente tabata bay y bin.

Alfredo Koolman, Director di WEB a brinda un splicacion durante un conferencia di prensa Dialuna atardi splicando mas riba kico tabata e situacion cu a presenta pa locual tabata e fayo cu a causa e blackout aki, lagando henter Aruba sin coriente pa algun ora.

E blackout a sucede mas o menos cuarto pa cinco di mainta, WEB a hiba un proceso di mas o menos seis ora pa recobra e suministro di coriente riba e isla. Ta asina cu cuarto pa cinco tabatin un incidente den e planta di WEB unda cu a perde e motornan nobo cu a wordo tuma over na inicio di Juli 2022. Esaki a conduci, segun Sr. Alfredo Koolman ta splica, cu WEB a haya nan mes den un situacion extremo unda tur produccion di coriente a bin abao. Gradualmente despues di tur esfuerso di personal, e director a bisa cu nan por a cuminsa haya un miho bista di e situacion, conhuntamente cu ELMAR a haci esfuersonan grandi pa recobra e suministro completo. Te na cierto momento esaki tabata bayendo bon, sin embargo e planta di WEB a confronta cu problemanan cu a conduci un di dos blackout rond di 8or di mainta.

Akinan mester a bay atrobe den un di dos intento pa busca e manera pa recobra e suministro – cada bes ta importante pa determina kico ta e origen di e problema, atende cu esaki di forma responsabel pa por recobra suministro di energia.

WEB ta lamenta cu mester haya nos mes den situacion di blackout y a duna un splicacion amplio riba cambionan di sistema cu nan ta bezig cune, cual ta un ‘transicion fundamental’ for di vapor pa 100% motor, cual ta rekeri hopi esfuerso di tur personal y esaki ta algo cu ta di lamenta, pero ta fayonan chikito cu por pasa segun Sr. Koolman a declara na prensa.

Naturalmente cu cada incidente cu nan haya nan ta bay investiga debidamente y pone procedura di investigacion tuma luga pa busca tur posibel contribucion na e problema. Pa cada incidente loke WEB ta haci cada bes ta determina e causa, e origen di e causa, di tal forma cu por tuma medida pa evita un ripiticion. WEB a pidi su disculpa na comunidad pa cu esaki, sinembargo ta bisa cu e personal semper ta haci tur loke ta posibel pa recobra suministro mas rapido y tuma medida pa evita ripiticion.