Ya caba e trabou di preparatorio di e proyecto conoci como Watty Vos Boulevard ( Ringweg 3) a cuminsa.
Segun informacion divulga recientemente pa DOW, e gastonan di e proyecto aki ta costa 180 miyon florin, y e trabou ta planea pa finalisa den 30 luna. Bon Dia Aruba a check su filenan y a bin topa cu un declaracion duna pa e mesun mandatario encarga cu Infrastructura cu a revela cu e proyecto aki tin un balor total di 440 miyon florin.
Bon Dia Aruba ta referi na e declaracion aki duna pa minister Benny Sevinger casi dos aña pasa, caminda el a laga sa cu e suma di 440 miyon florin ta loke gobierno tin e compromiso di paga den 20 aña. E proyecto mes ta mas barata, pero pais Aruba mester paga alrededor di 260 miyon florin den interes, pero tambe mantencion di e proyecto grandi aki durante 20 aña.
Pais Aruba lo paga alrededor di 22 miyon florin pa aña durante 20 aña pa e proyecto aki. E tempo aya e mandatario a aclaria cu 240 miyon ta e prijs maximo cu pais Aruba ta bay paga, y eventualmente e por ta un tiki mas abou cu e suma aki cu a haya aprobacion di Parlamento.
E compania internacional Mota Engil Colombia ta encarga cu e proyecto aki. E ta esun cu a ofrece e miho prijs durante e destaho publico unda un total di 5 compania grandi internacional a participa, di cual tres a wordo scogi y na final Mota Engil Colombia a gana e bid aki.
