E trabou di Watty Vos Boulevard tabatin dos fecha destina. E fecha conservativo, cu ta fin di october cu lo haci’e disponibel pa trafico uza y fecha optimista cu ta e prome siman di october. Director di DOW a splica tocante e situacion, mirando cu october a cuminsa.
Marlon Croes, Director di DOW, a bisa cu en berdad a drenta e prome siman di october y tin orden di ingeniero cu ta wardando pa e rapport drenta. Nan ta spera cu lo drenta den e siman di 11 october. Despues di esey gobierno lo tin e rapport pa lesa y studia si ta cuadra cu tur ‘items habri cu por stroba un caminda’.
Si e rapport drenta y tur cos sali positivo, nan ta premira cu pa fin di october lo tin caminda habri pa trafico. Sinembargo, Croes ta remarca cu e no lo ta 100% den su totalidad, tin algun detaye cu mester garantisa pa siguridad primordial pa usuario, ‘nos ta wak e proceso ey’.
Ora cumpli cu esaki, e ta wordo habri pa trafico por core.
Tambe tin algun otro area cu manera trayectorio di fin aeropuerto te cu Sun Plaza lo haya su ‘embeyecemento’. Den area di Juancho Irausquin te cu Eagle Beach lo tin cambio pa locual trata di promenade cu ta crea pa peaton y ciclista por haci uzo di dje.
“Esey lo trece mas siguridad pa ciclista. Tambe mester bin cu campaña di conscientisacion, pa asina informa pa haci uzo di fietspad y no caretera, pasobra e diferencia di ciclista y auto ta grandi unda cu por trece riesgo pa ciclista”, Croes a bisa.
