Washington ta parce cla pa bira e prome estado pa permiti un entiero alternativo, conoci como ‘reduccion natural organico’ – un proceso di descomposicion acelera cu ta converti curpa den compost den apenas algun siman.
E legislacion legalisando e proceso, algun biaha referi como ‘compost humano’, a pasa e legislatura y ta bayendo e bureau di gobernador democrata, Jay Inslee.
Si Inslee firma esaki, e ley nobo lo drenta den efecto dia 1 di mei 2020. Vocero di Inslee, Jaime Smith, a bisa cu mientras e oficina di gobernador ainda ta revisando e legislacion, ‘esaki ta parce un esfuerso bon pensa pa suavisa nos marca’ riba planeta Tera.
E sponsor di e medida, senador democrata Jamie Pedersen di Seattle, a bisa cu e forma di minimo impacto ambiental pa deshaci di restonan ta logico, especialmente den areanan urbano hopi druk.
E proceso di reduccion natural organico ta rindi 0.76 m2 di compost pa cada curpa – suficiente pa yena dos garoshi grandi. Pedersen a bisa cu e mesun leynan cu ta aplica na e restonan despues di cremacion ta aplica na e compost: famia por tene e compost den urna, uz’e pa planta un arbol riba propiedad priva, of plam’e riba tereno publico den e estado, semper y cuando nan cumpli cu e permisonan existente tocante restonan.
“Ta un tiki sorprendente cu bo tin un experiencia humano completamente universal – nos tur ta bay muri – y esaki ta un area unda tecnologia no a haci nada pa nos. Nos tin dos manera pa deshaci di restonan humano, cual nos tabatin pa miles di aña, derando y kimando”, Pedersen a bisa. “Ta parce un area cu ta hecho pa tecnologia duna nos miho opcionnan cu esunnan cu nos a uza.”
Pedersen a bisa cu un votado emprendedor, kende su estudio di e proceso a bira su master thesis, a trece e idea dilanti cerca dje.
Katrina Spade, fundado y CEO di Recompose, tabata un studiante di posgrado den arkitectura na University of Massachusetts Amherst, ora el a bin cu e idea – modelando esaki riba un practica cu cunukeronan ta uza pa decadanan pa deshaci di bestia.
El a modifica e proceso un tiki, y a haya cu e uzo di chip di palo, alfalfa y hooi ta crea un mescla di nitrogeno y carbon cu ta acelera descomposicion natural ora un curpa ta poni den un recipiente cu humedad y temperatura controla, y esaki ta dal ronchi.
Seis curpa humano – tur di nan donacion kende Spade a bisa kier a bira parti di e estudio aki – a wordo reduci na compost durante un proyecto piloto na Washington State University aña pasa. E transformacion di curpa pa compost a dura entre cuater y shete siman, Spade a bisa.
Segun e Cremation Association of North America, e cifranan di cremacion na Washington ta esunnan mas halto den e pais. Mas di 78 porciento di esunnan cu a muri den e estado na 2017 a wordo crema, y e number ey ta spera di yega 82 porciento na 2022.
Spade a bisa cu e no kier reemplasa cremacion ni entiero, sino ofrece un alternativa significativo cu ademas ta considera medio ambiente. “Nos meta ta pa provee algo cu ta alinea cu e ciclo natural mas cu ta posibel, pero ainda realistico den por yuda un cantidad di famia y no tuma asina hopi tereno como entiero lo tuma”, el a bisa.
Pedersen a bisa cu e ta kere cu toch e lo kier un marca den un santana ora e muri, pero a bisa cu e ta atrai pa e idea di su curpa tumando menos espacio cu un proceso manera reduccion natural organico. “Mi ta kere ta un manera hopi bunita di bandona mundo”, el a bisa.
