Presidente Donald Trump a presiona repetidamente Presidente di Ucrania, Volodymyr Zelenskiy, pa habri un investigacion di corupcion riba e democrata Joe Biden, segun un transcripcion di un yamada di telefon cu a keda publica pa Cas Blanco.
E yamada ta den centro di investigacion di huicio politico di Trump na man di democratanan. Durante e yamada di telefon, Trump ta bisa cu ‘mi lo kier bo haci e fabor’. E palabra di Trump a establece e parametro di debate politico pa bin – apenas e di cuater investigacion pa huicio politico di un presidente den historia di e nacion.
E respuesta inicial a resalta e division profundo entre e dos partido: Democratanan a bisa cu e yamada ta un ‘shakedown’ di un lider stranhero, mientras Trump – cu sosten di mayoria di republicanonan – a bisa e ta un ‘yamada di nada’.
Trump a pasa su dia den reunion cu lidernan mundial na Nacionnan Uni, cu un reunion cu Zelenskiy riba su agenda. Zelenskiy a bisa e no kier ta involucra den eleccion Mericano, pero cu den e yamada, ‘ningun hende a presiona mi’.
“Ta un joke. Huici politico pa kico?”, Trump a bisa.
Trump, kende ta prospera den combate, a desafia e democratanan pa duna un stap. E ta confía cu e huicio politico lidera pa e partido di oposicion lo dune forsa, na luga di baha su sosten politico.
Republicanonan mayormente a tuma partido pa e presidente y a bisa cu e no haci nada malo den e yamada.
Mientras cu e posibilidad di huicio politico ta riba Trump pa varios luna, e probabilidad di un investigacion ta disminui despues cu investigacion di Consehero Special Robert Mueller di Trump-Rusia a caba sin directiva cla pa legisladonan.
For di e tempo ey, Comite di Congreso a revisa aspectonan di e investigacion di Mueller mientras tambe lansando investigacionnan nobo den negoshinan di Trump y varios scandal di e administracion, cual tur ta parce di dura largo.
