No ta mira nada di e renobacion di Parke Curason ainda manera Fundacion Facilidadnan Deportivo (FFD) a declara na Bon Dia Aruba un par di siman pasa cu ya mester a cuminsa caba. Un di e empleadonan a wordo duna un warning pa acerca prensa riba topico di renobacion di e parke, mientras basta tempo el a expresa su preocupacion interno tambe pa cu e mal estado di e parke.

 Tur dia e parke, miho conoci como Parke Jaburibari ta druk cu hende cu ta cana, haci deporte of uzo recreativo, kende tambe hopi mucha. Manera nos a publica algun siman atras, e estado di e parke ta deplorabel. Par di ekipo pa haci ehercicio rond di e parke su metal a frustia, falta pinta e edificionan y hekinan rond di e parke y tin un area di parkeo cu no ta den funcion pasobra no tin iluminacion den e area.

Director Junior Tromp di e fundacion cu ta maneha e parke, ta splica cu ‘keto bay renobacion di Parke Curason ta wordo ehecuta di manera clandestino’. Den e prome entrevista cu nos a publica par di simannan pasa, el a conta cu e fundacion tabata en movecion pa cuminsa mantencion di e parke dentro di un siman. Sr. Tromp a clarifica cu Cruyff Foundation lo tabata di trece un mat di yerba nobo pa e cancha di futbol for di Hulanda. Tambe cu lo haci mantencion riba e ekiponan pa haci ehercicio rond di e parke y basha pintura nobo riba e edificionan.

Estado actual di e parke
Nos reportero a bay tira un bista na e parke y no por a nota ningun cambio den e situacion. Un persona cu tabata canando den e parke a expresa cu e lo kier wak un miho mantencion den e parke.  Personanan y muchanan cu ta practica e deporte di freestyle BMX a expresa cu nan lo kier pa e parke wordo mantene mas regularmente pa asina garantisa e siguridad di esunnan cu ta practica e deporte aki.

Un di e personanan cu ta practica e deporte, Daniel Tromp, a expresa cu: “E parke ta hopi bunita y mi tin di aprecia cu esaki ta e unico luga na Aruba cu ta haci’e posibel pa mi sigui dilanti cu mi deporte. Danki na e parke mi por a bay representa Aruba den competencianan na otro islanan den Caribe. Pero pa e mesun rason aki mi ta kere ta importante pa e parke wordo manteni.”

E hoben ta splica cu hopi biaha e rampa nan ta daña y nan mes ta trece plywood pa yuda drecha esaki. “Mi ta spera esunnan responsabel pa mantencion di e parke tambe ta realisa e estado cu e parke ta aden.”

 Un persona cu tabata vocifera su frustracion cu e estado di e parke frecuentemente den pasado ta un empleado di e parke mes. George, e manager di siguridad na e parke anteriormente a acudi na medionan di comunicacion pa expresa su frustracion. Sinembargo ora nos a acerca George, el a nenga di duna comentario. Esaki debido na e hecho cu gerencia di e parke a dun’e un warning pa papia malo di e parke na prensa.

Reaccion FFD
Redaccion a bolbe tuma contacto cu sr. Tromp pa clarifica con e procedura di mantencion ta bayendo den e parke. Segun sr. Tromp, el a splica cu por ta cu e mantencion no ta notabel, pero cu nan a busca e materialnan pa cuminsa traha. E trabou cu ta wordo haci actualmente ta sosodiendo ‘behind the scenes’. Sr. Tromp ta splica cu esaki ta pasobra ‘nos mester haci trabou awor cu ta exigi un tiki precaucion’.

Nos reportero a purba haya clarificacion di exactamente ki trabounan ta tumando luga, pero sr. Tromp a nenga bisando cu: “Si mi no bay hunto cu boso pa splica, mi ta keda mesun leu. Bo por bay check pero bo no lo haya nada. Si mi bay mustra y splica e ora ey bo lo wak tur e trabou cu ta pasando. Un di e areanan principal pa nos ta e cancha di futbol.”

Sr. Tromp a splica cu e deadline pa tur renobacion ta aki 5 siman. Esaki lo ta mas o menos pa 11 di october. Nos redaccion lo keda riba e topico aki y lo purba haya un tour di e renobacionnan tumando luga ‘behind the scenes’ cu sr. Tromp di FFD.