Reino di Hulandes ta bay solicita un mayor proteccion pa e tiburonnan di rif di Caribe durante e Conferencia di Partinan pa Convenio di Cartagena (COP) den e luna binidero na Aruba. E tiburonnan di rif di Caribe ta hunga un papel fundamental den mantencion di un ecosistema di rif saludabel y den desaroyo di resistencia dentro di e oceannan. E mayor proteccion aki ta fundamental pa garantisa un futuro sostenibel pa e especie iconico aki.
Lama Caribe ta famoso pa su awanan cristalino, rifnan di coral vibrante y un deslumbrante variedad di bida marino. Entre e habitantenan carismatico di e paraiso submarino aki tin Tiburon di Rif di Caribe (Carcharhinus perezii), un especie cu ta hunga un papel crucial den mantencion di salud di e ecosistemanan di e rifnan di coral. Den Caribe Hulandes e animalnan di presa enorme aki ta enfrenta menasanan creciente, pero tin speransa na horizonte. Den e proximo Conferencia di e Partinan di Convencion di Cartagena (COP), Reino Hulandes lo busca un mayor proteccion pa e criaturanan magnifico aki door di inclui e especie aki den Anexo III di e Protocol SPAW. Anexo III ta inclui especie di mata y bestia cu ta rekeri proteccion adicional pa garantisa cu e especie aki por recupera nan poblacionnan den Region di Gran Caribe adecuadamente.
Importancia
E tiburonnan di rif di Caribe ta prospera den e awanan cayente y tropical di region di Caribe, cu un rango di distribucion cu ta core desde Florida te Brasil. E especie aki ta un di e especienan di tiburon di rif mas haya den henter Lama Caribe. Cu un longitud di te 3 m (9.8 pia), e tiburon aki ta un di e animalnan mas grandi di e ecosistema di rif y ta na top di e red alimentario marino, teniendo solamente algun animal di presa natural.
Ademas di tin un gran balor economico, ya cu buceo cu tiburon ta hopi atractivo pa buceador di henter mundo, e especie aki tambe ta fundamental pa mantene ekilibrio dentro di e ecosistema di rif. Su presencia ta yuda regula e poblacion di especie di presa mas chikito, loke na su turno ta evita comemento di yerba di lama excesivo y e rifnan di coral y ta elimina e piscanan malo of debil di e poblacion. E ekilibrio aki ta esencial pa mantene salud y diversidad di henter e rif di coral.
Menasanan
A pesar di su importancia ecologico y economico, e tiburonnan di rif di Caribe ta enfrenta hopi menasa cu a causa reduccion di su poblacion calcula entre 50% y 79% den e ultimo 29 añanan.
Den Caribe (Hulandes) esaki ta debi principalmente na:
Degradacion di e habitat: E degradacion di e rifnan di coral y e praderanan marino debi na cambio climatico, contaminacion y desaroyo di costa tin un impacto directo den disponibilidad di presa pa e tiburonnan aki. Perdida di habitat ta reduci su capacidad pa haya alimento y refugio.
Sobrepesca: Sobrepesca ta representa un di e menasanan mas inmediato pa e tiburonnan di rif di Caribe. Hopi biaha nan ta captura nan incidentalmente den peskeria comercial, na unda e piscadonan ta busca otro especie, of intencionalmente, unda ta busca nan pa nan halanan, cu ta uza den sopi di hala di tiburon.
Un yamada pa un mayor proteccion
Tin diferente organisacion y individuo cu ta traha pa proteha e tiburonnan y nan habitatnan den Caribe Hulandes. Un logro importante tabata establecimento di areanan proteha manera Santuario di Tiburon y Mamifero Marino Yarari entre Boneiro, Saba y San Eustatius. Otro logro a keda produci na aña 2019, ora cu gobierno Hulandes a adopta un Strategia Internacional pa e Tiburonnan.
E strategia establece aki tin accionnan di proteccion y maneho di tiburon y raya cu gobierno mester tuma den tur e lamanan y oceannan na unda Hulanda tin influencia (incluso Caribe Hulandes). Ainda mester di esfuerso adicional pa crea mas area marino proteha, mehora aplicacion di e ley, reduci contaminacion den ocean y promove practica di pesca sostenibel. E especienan aki no conoce frontera (politico) y nan proteccion ta rekeri esfuerso di conservacion na gran escala paden y pafo di Caribe Hulandes.
Conclusion
Tiburon di rif di Caribe ta un especie di suma importancia pa e rifnan di coral di Caribe (Hulandes). Cu e proteccion adicional cu lo solicita durante e proximo reunion di COPS na Aruba, tin speransa cu e especie aki lo tin un futuro saludabel. Door di reconoce nan importancia ecologico y e desafionan cu nan ta enfrenta, nos por traha hunto pa garantisa un miho futuro pa e tiburonnan di rif di Caribe den Caribe Hulandes y mas leu.
DCNA
The Dutch Caribbean Nature Alliance (DCNA) pa Naturalesa ta sostene comunicacion (cientifico) y divulgacion den region di Caribe Hulandes door di haci cu e informacion cientifico relaciona cu naturalesa ta mas disponibel a traves di entre otro, Dutch Caribbean Biodiversity Database, e plataforma di noticia BioNews di DCNA y prensa. E articulo aki ta contene e resultadonan di varios estudio (cientifico), pero e estudionan riba nan mes no ta estudio di DCNA. No tin derecho pa saca nada di e contenido. DCNA no ta responsabel pa e contenido y e impactonan indirecto cu resulta di e publicacion di e articulo aki.
