Den ora nan di diamars madruga, Centro Maritimo Operacional (MOC) di Wardacosta a ricibi un notificacion di un barco crucero nabegando den direccion di Aruba pidiendo asistencia. Tabata trata di un turista hende homber di nacionalidad Mericano di 83 aña di edad cu a haya problema nan di hemoragia.
Personal di MOC inmediatamente a tuma contacto cu e medico di CITRO pa evalua e situacion. E medico di CITRO a constata cu e miho opcion pa e persona tabata pa transporte mes ora cu helicopter, pa asina e por ricibi tratamento medico na e hospital na Aruba.
Inmediatamente a alerta personal di e helicopter di Wardacosta cu a sali rapido den direccion di e barco pa asina transporta y hiba e pashent aeropuerto. Hunto cu e pashent tambe a transporta e medico di e barco, mirando cu e situacion di pashent tabata hopi delicado.
Personal di ambulance tabata presente pa transporta e persona pa e por ricibi tratamento medico na hospital.
